Bator biddas lacanàrgias s’atopant in sa punta prus arta de sa Sardigna pro tzelebrare natura, amighèntzia e solidariedade.
Domìnigu s’11 de maju ruet sa de 23 editziones de sa manifestatzione escursionistica “La Montagna che unisce”, lòmpida a su de 14 addòbios suos cun sa “Sentiero Stellare Beato Frassat”. S’initziativa, promòvida dae su Club Alpinu Italianu – Setzione de Nùgoro e sustentada dae sos Comunos de Àrthana, Dèsulu, Fonne e Biddamanna Strisàili, est intre sas prus importantes in Sardigna pro sa valorizatzione de su monte e sa promotzione de una cultura de s’ambiente in manera cumpartzida e giuditziosa.
Perdas Crapias (Punta La Marmora) sa punta prus arta de s’ìsula (1834 m), at a devènnere torra sìmbulu de unione e fratellàntzia. Bator tropas de escursionistas de sos bator comunos chi istrèmenant in su Gennargentu, s’ant a agatare paris in cùcuru in unu momentu colletivu de tzelebratzione e respetu pro sa natura.
Sa manifestatzione si proponet comente un’ocasione de addòbiu intre sas comunidades locales, in su sinnu de sa solidariedade e de s’amighèntzia. Nàschida in su 2002 in “Annu Internatzionale de su Monte”, custa die cheret afortiare su ligàmene intre sas persones e s’ambiente, intzentivende su connoschimentu de su territòriu montanginu e de sas potentzialidades suas fintzas in crae educativa.
Programa:
Àrthana: atopu in Nùgoro a sas 7:00, partèntzia pro s’escursione a sas 9:30 (dislivellu 480 m – dificultade E).
Dèsulu: partèntzia dae S’Arena a ora de sas 9:00 (dislivellu 540 m – dificultade E).
Fonne: atopu a sas 7:30, partèntzia dae Su Separadorgiu a sas 9:00 (dislivellu 370 m – dificultade E).
Biddamanna: partèntzia dae Serrau Bidu a sas 8:30 (dislivellu 770 m – dificultade E).
S’arribu in punta est prevìdidu a sas 12:00, in ue est prevìdidu un’addòbiu intre sos partetzipantes pro cumpartzire s’esperièntzia e pro fàghere craru dae su “cùcuru de sa Sardigna”.
S’essida est a s’indonu e aberta a totus, ma si racumandat unu bonu allenamentu fìsicu pro afrontare sos percursos, chi càmbiant cunforma a sa longària e a su dislivellu. S’initziativa est patrotzinada dae sa Regione Autònoma de sa Sardigna.
Attività realizzata col contributo della Regione Sardegna – IMPRENTAS 2024-2025. LR 22/2018. Atividade realizada cun su contributu de sa Regione Sardigna – IMPRENTAS 2024-2025 LR 22/2018
