Su prèmiu Otieri de literadura sarda, cunfirmende·si su prus mannu e prus de importu cuncursu sardu (su de sete in Itàlia e cun 70 annos de atividade su 2026), at annuntziadu is binchidores de sa de 66 editziones suas.
Su Prèmiu torrat a tzelebrare s’idea de giudu de su babbu suo 𝗧𝗼𝗻𝗶𝗻𝘂 𝗟𝗲𝗱𝗱𝗮 cun sa tzerimònia finale de su 𝟮𝟮 𝗱𝗲 𝘀𝗮𝗻𝘁𝗮𝗻𝗱𝗿𝗶𝗮. E mescamente torrat a afestare sa grandu comunicatzione literària in 𝘀𝗮𝗿𝗱𝘂 e in is 𝗮̀𝘁𝗲𝗿𝗮𝘀 𝗹𝗶𝗺𝗯𝗮𝘀 𝗱𝗲 𝗦𝗮𝗿𝗱𝗶𝗴𝗻𝗮, dende ondras a autores e òperas chi finas ocannu ant dadu proa de profundidade e innovatzione in sa cultura cuntemporànea de s’Ìsula.
Conchistat sa prima positzione de sa setzione poesia “Antoni Sanna” sa veterana Teresa Piredda, nàschida in Iscroca e ùnica fèmina de is tres pòdios: càntigos disisperados e chentales fertos caraterizant su cumponimentu suo “𝗜𝗻𝗴𝘂𝗿𝘁𝗼𝘀𝘂𝘀”. Piredda binchet fintzas su Prèmiu emigrados, sende chi nch’istat in Perùgia.
In sa setzione “Toninu Ledda” riservada a sa prosa, binchet s’orunesu Luciano Goddi, nùmene nou de su Prèmiu: in su contu suo “Su cathechisimu de madre Tilde” protagonista est unu pitzinnu de deghe annos.
E comente in sa de 63 editziones torrat a bìnchere in sa setzione “Antoni Cubeddu” s’arrepentista biddobranesu Antoni Nàtziu Garau dende boghe a sa suferèntzia de is palestinesos cun Sa boxi muda de s’arrennegu“𝗦𝗮 𝗯𝗼𝘅𝗶 𝗺𝘂𝗱𝗮 𝗱𝗲 𝘀’𝗮𝗿𝗿𝗲𝗻𝗻𝗲𝗴𝘂”.
In sa segunda e in sa de tres positziones b’amus is versos de 𝗔𝗻𝘁𝗼𝗻𝗶 𝗕𝗿𝘂𝗻𝗱𝘂 (cun “A ube sun fughidos?”) e de 𝗗𝗼𝗺𝗲𝗻𝗶𝗰𝗼 𝗕𝗮𝘁𝘁𝗮𝗴𝗹𝗶𝗮 (cun “Quiddu chi resta d’un fiòri”), is istòrias de 𝗠𝗮𝗻𝘂𝗲𝗹 𝗖𝗵𝗲𝗿𝗰𝗵𝗶 (cun “De campu e de tzilleri”) e de 𝗟𝘂𝗰𝗮 𝗦𝗲𝗱𝗱𝗮 (cun “Ballos”), is cantzones de 𝗚𝗶𝗮𝗻𝗳𝗿𝗮𝗻𝗰𝗼 𝗚𝗮𝗿𝗿𝘂𝗰𝗰𝗶𝘂 (cun “Tu se’ maggjina d’amori”) e de 𝗦𝗮𝗻𝗱𝗿𝗼 𝗕𝗶𝗰𝗰𝗮𝗶 (cun “Ite coro?”).
A custa editzione, faghet ischire una nota de imprenta, b’ant leadu parte 85 autores cun 96 cumponimentos iscritos in is tres setziones de su bandu: 57 poesias, 23 contos e 16 cantzoens. Sa giuria ghiada dae su dotzente universitàriu Dino Manca at valutadu custas òperas a primu cun valutatziones individuales e a pustis pro mèdiu de unu cunfrontu dialèticu fundudu a prus livellos. Est gasi chi nd’est essida a campu custa classìfica definitiva.
“Lompimus a sa de 66 editziones – narat su 𝗽𝗿𝗲𝘀𝗶𝗱𝗲𝗻𝘁𝗲 𝗱𝗲 𝘀’𝗔𝗽𝘀 𝗣𝗿𝗲𝗺𝗶𝗼 𝗢𝘇𝗶𝗲𝗿𝗶 𝗩𝗶𝘁𝘁𝗼𝗿𝗶𝗼 𝗟𝗲𝗱𝗱𝗮 – giughende galu a dae in antis 𝘀𝘂 𝗯𝗶𝘀𝘂 𝗱𝗲 𝗧𝗼𝗻𝗶𝗻𝘂 𝗟𝗲𝗱𝗱𝗮 e abarrende in 𝘀𝘂 𝘀𝘂𝗿𝗰𝘂 𝘀𝗲𝘀𝘁𝗮𝗱𝘂 𝗱𝗮𝗲 𝗔𝗻𝘁𝗼𝗻𝗶 𝗖𝗮𝗻𝗮𝗹𝗲, segretàriu istòricu de su Prèmio. Torro gràtzias a totu is poetas, a sa giuria, a su segretàriu nou 𝗠𝗮𝗿𝗰𝗼 𝗙𝗲𝗻𝘂𝗱𝗶 e a su vitze presidente 𝗣𝗶𝗲𝗿 𝗟𝘂𝗶𝗴𝗶 𝗦𝗮𝗯𝗮, gasi etotu a totu is partner istitutzionales chi creent a custa esperièntzia literària manna”.
In sa tzerimònia finale b’ant a èssere fintzas is òspites ispetziales 𝗠𝗶𝗰𝗵𝗲𝗹𝗲 𝗟𝗼𝗽𝗼𝗿𝗰𝗮𝗿𝗼 (linguista e glotòlogu de s’Universidade de Zurigu chi at a retzire su 𝘁𝗿𝗼𝗳𝗲𝘂 “𝗣𝗿𝗲𝗺𝗶𝗼 𝗢𝘇𝗶𝗲𝗿𝗶”), 𝗠𝗮𝗻𝘂𝗲𝗹𝗹𝗲 𝗠𝘂𝗿𝗲𝗱𝗱𝘂 (illustradore e iscritore nugoresu chi l’ant a dare su “𝗣𝗿𝗲̀𝗺𝗶𝘂 𝗱𝗲 𝘀𝗮 𝗰𝘂𝗹𝘁𝘂𝗿𝗮”), sa cantante etnopop 𝗠𝗮𝗿𝗶𝗮 𝗟𝘂𝗶𝘀𝗮 𝗖𝗼𝗻𝗴𝗶𝘂 (“𝗣𝗿𝗲̀𝗺𝗶𝘂 𝗱𝗲 𝘀’𝗮𝗿𝘁𝗲”) e s’ex amministradore pùblicu e iscritore de Itireddu 𝗗𝗶𝗲𝗴𝗼 𝗦𝗮𝘁𝘁𝗮 (prèmiu “𝗖𝗶𝘁𝘁𝗮̀ 𝗱𝗶 𝗢𝘇𝗶𝗲𝗿𝗶”).
S’apuntamentu cun sa tzerimònia est 𝗮 is 𝟱 𝗱𝗲 𝗺𝗲𝗿𝗶𝗲 𝗱𝗲 𝘀𝗮̀𝗯𝗮𝗱𝘂 𝘀𝘂 𝟮𝟮 𝗱𝗲 𝘀𝗮𝗻𝘁𝗮𝗻𝗱𝗿𝗶𝗮 in su 𝗧𝗲𝗮𝘁𝗿𝘂 𝘁𝘇𝗶̀𝘃𝗶𝗰𝘂 𝗱𝗲 𝗢𝘁𝗶𝗲𝗿𝗶. Presentat sa serada 𝗣𝗶𝗲𝗿𝘀𝗮𝗻𝗱𝗿𝗼 𝗣𝗶𝗹𝗹𝗼𝗻𝗰𝗮. Prevista fintzas sa 𝗱𝗶𝗿𝗲𝘁𝗮 𝗬𝗼𝘂𝘁𝘂𝗯𝗲.
