Resessida manna eris sero in sa sala polifuntzionale de su Comunu de Elini pro sa presentada de su libru “Elini. Andalas de memoria”, un’istùdiu genealògicu subra sa comunidade de Elini. A s’atopu ant leadu parte medas elinesos, ma puru gente de sas biddas a costadu. In su pùblicu fintzas su cunsigeri regionale ogiastrinu Salvatore Corrias, su sìndigu de Irbono e de Orthullè.
Sa serada est cumentzada cun s’introduida de Luca Lobina, chi at moderadu, unu fatu a s’àteru, sos interventos de s’autore Pino Ledda, genealogista e istòricu, de Edoardo Fiorillo, responsàbile de s’Istitutu de Chirca Genètica e Biomèdica de Lanusè, de Rosaria Melis, ostètrica de su Consultòriu de Lanusè, de Giulia Olianas, chircadora de su Tzentru Istùdios de Gènere – UNISS, de Mauro Mura, diretore de sa rivista Làcanas, e de Vitale Pili, presidente de su GAL Ogiastra e sìndigu de Elini.
S’òpera, tìtulu cumpletu “Elini. Andalas de memoria: dentro la storia genealogica di una piccola grande comunità ogliastrina passando dalla porta dell’anima” (Ed. Domus de Janas, foto cobertina E. Olianas), analizat sa genealogia de sas famìlias elinesas dae su 1640 a su 2024, torrende a cumpònnere s’istòria de totu sos areos de sa bidda, descriende·nde sas orìgines issoro in sos sèculos.
S’autore, in sa faina sua, at pòdidu contare subra s’agiudu continu de sos elinesos, siat residentes siat emigrados. Custu istùdiu genealògicu faghet parte de su progetu Andalas de Memoria, un’initziativa chi tenet sa tarea de preservare s’identidade, sas traditziones e s’istòria de Elini e fintzas de s’Ogiastra. Sa presentada at afrontadu temas chi andant dae sa longevidade de sos tzentenàrios a sa mortalidade infantile, dae sos mortos causados dae s’ispanniola a sos cojos endogàmicos a esogàmicos, evidentziende una rete de ligàmenes familiares chi nche giumpat sas làcanas de sa bidda.
Sa chirca s’est basada subra documentos de s’Anàgrafe Tzivile, ativa in Elini dae su 1 ghennàrgiu 1866, sos Quinque Libri de s’Archìviu Diotzesanu de Lanusè, sos Registros de s’AIRE (Anàgrafe Italianos Residentes in s’Èsteru), e sos documentos de su Comunu de Irbono, essende chi Elni nde fiat sa fratzione finas a su 1958. A custos materiales s’agiunghent testimonias de importu regortas cun intervistas a sos betzos de sa bidda e fotografias inèditas.
Pino Ledda, genealogista e istòricu de fama, est nàschidu in Àrbus in su 1958. Cun una carriera dedicada a sa chirca genealògica e istòricu-sientìfica, Ledda est connotu pro su contributu suo a sos istùdios subra sa longevidade e pro òperas comente “Sa genti de Seui”, “Seulo, per non perdere la memoria” e “Ales. Storia di una comunità”.
Sa serada s’est concruida cun s’esibitzione de su Grupu Musicale Novosono, de s’Assòtziu Culturale Arte in Musica, e unu cùmbidu pro totu sos partetzipantes.
