Su nie est covechende sos cùcuros de su Gennargentu, su paris artu de Campeda e àteros chirros de Sardigna. Ma un’àteru tipu de àstragu est chinghende·si sa terra nostra: s’ierru demogràficu. Sos datos de custu comintzu de su 2026 cunfirmant una tendèntzia chi no est tzertu una novidade, ma chi si presentat comente una ferida mala a si crujare.
Sa Sardigna, ùrtima regione de Europa, est semper de prus sa terra de sos betzos, de sos bàntzigos bòidos e fintzas de sas domos. Su mudìmene duncas no est tantu su de sa natura covecada dae sa manta niada, ma su de sas iscolas chi serrant, de sos giogos chi no intendimus prus peri sos gùturos, de sas cortes serradas su bonu de sas dies.
Che a onni annu comintzende, sos pipios chi si presentant a su mundu sunt che a sas isperas. A ora de sas duas de su primu de ghennàrgiu, in su policlìnicu Duilio Casula de Pauli est nàschida Marta. In cussas iscutas, pagos minutos a pustis, est nàschidu Salvatore in su Santu Martine de Aristanis. Fatu fatu Iris a sas 3 mancu 10. In su Giuanne Pàulu II de Terranoa at bidu sa lughe imbetzes Abdul Aziz Geye (forsis sa nova prus cummentada dae sa peus utèntzia de sos social).
Ma giai assustat chi in Tàtari peruna mama s’est illierada intre su 31 de nadale e su primu de ghennàrgiu. Pagu male, si pensamus chi in paritzas biddas su primu arrivadu galu non b’est e in prus de calicuna at a tardare.
Ma s’annu nou est fintzas tempus de bilantzos. In su primu puntu nàschidas de Casteddu, s’ospidale de sa Santissima Trinidade, s’annu in pessu coladu s’est serradu cun 1200 criaduras aberende sos ogros a sa vida, dughentos in mancu de su 2024. In prospetiva est finas peus. Cunforma a sos datos Istat sa populatzione residente podet menguare de un’àteru 25%.
No est chistione de bonus bebè ma de polìticas istruturales: si sos trasportos sighint a èssere sos chi sunt, si sa sanidade nd’est falende a cantzos, si non si ponet frenu a sa fua de sos pitzocos de custa terra, si non semus a tretu de pensare a una polìtica chi acollat a babbos e mamas de àteros Abdul Aziz, de s’ierru meteorològicu nd’amus a faeddare petzi cando lu faghet. S’ierru demogràficu b’at perìgulu chi su mudet a intrinada.
Atividade realizada cun su contributu de sa Regione Sardigna – IMPRENTAS 2025-2026. LR 22/2018, art 22. Attività realizzata col contributo della Regione Sardegna – IMPRENTAS 2025-2026. LR 22/2018, art. 22
