B’at una lege chi est dende oriolos mannos a sas guidas turìsticas sardas. Est sa de su 13 de nadale, a nùmeru sa 190. Cun sa normativa annoada b’at dae como in susu un’abilitatzione natzionale e non prus regionale; duncas sas guidas noas si nch’ant a dèvere marcare a s’elencu italianu.
Custu cheret nàrrere chi b’at novidades finamentas in sos recuisitos: in primis tocat de àere una làurea triennale e, fatu fatu, colare un’esame de caràtere generale. Nudda chi pertochet sas connoschèntzias de su logu e de s’istòria sua. Sas ispetzializatziones territoriales o temàticas sunt facoltativas, ma custu cheret nàrrere chi bi cheret meda prus tempus trighende su comintzu de su traballu.
De prus, s’elencu natzionale (chi pertocat fintzas sas guidas giai ativas e non sas noas ebbia), mancari non siat un’albo professionale, est comente chi lu siat: difatis b’at òbligos de formatzione partzidos in triènnios; e cherent acumpridos pro pòdere sighire a traballare.
Prevìdida finamentas s’istìpula de un’asseguratzione pro sa responsabilidade tzivile, semper pro pòdere esertzitare.
E àteru est chi b’at in contu de iscritzione a s’albo: sas abilitatziones de sa Ras, a diferèntzia de sas de àteras regiones, no inditant sas limbas de traballu, nen sas ispetzializatziones otènnidas, e custas sunt cosas chi impedint s’iscritzione a s’elencu.
A concruos b’est su problema de sa prestatzione ocasionale e temporànea pro sas guidas istràngias cuantificada in 60 dies, belle un’istajone intrea. Una diversidade de tratamentu chi penalizat sos de inoghe; cosa chi s’annanghet a s’òbligu de su possessu de tzertificatziones linguìsticas dae entes reconnòschidos, vìnculu prevìdidu pro sas guidas natzionales ebbia.
Bi perdent sos traballadores de inoghe ma bi perdet finamentas sa calidade de su turismu de calidade propostu dae chie bivet e connoschet su territòriu. S’assòtziu sardu Argts s’est movende pedende mudadas a s’impiantu normativu.
Attività realizzata col contributo della Regione Sardegna – IMPRENTAS 2023-2024. LR 22/2018. Atividade realizada cun su contributu de sa Regione Sardigna – IMPRENTAS 2023-2024 LR 22/2018
