Unu momentu de cunfrontu abertu a s’iscola e a tota sa tzitadinàntzia pro aprofundire una de is trasformatziones prus significativas de su tempus nostru. Su Comunu de Ìsili, paris cun cun s’Istitutu de Istrutzione Superiore Zappa-Pitagora, at ammaniadu pro su 10 de abrile a ora de is 10:30, in su Tzentru Sotziale Don Salvatore Sanna, un’addòbiu pùblicu dedicadu a su tema de s’Inteligèntzia Artifiziale pro allegare in manera crara, atzessìbile e cuncreta de custa tecnologia noa chi est mudende su modu nostru de bìvere, istudiare e traballare.
S’iniziativa, a tìtulu “Intelligenza Artificiale – conoscere l’essenziale”, at a tènnere comente a reladore a Gabriele Congiu, autore, editore e divulgadore culturale sardu, dae annos impinnadu in s’aprofondimentu de is temas acapiados a s’innovatzione tecnològica e a is linguàgios de sa contemporaneidade. Congiu s’ocupat prus che totu de inteligèntzia artifitziale, editoria, gràfica e comunicatzione, e tenet un’esperièntzia manna in su setore informàticu e creativu.
Congiu at ghiare su pùblicu in una riflessione in contu de is aspetos ligados a s’impreu de s’inteligèntzia artifiziale, afrontende temas de atualidade manna comente ètica, creatividade e responsabilidade individuale e colletiva.
Un’atenzione particulare s’at a dedicare a su mundu de s’iscola, de sa formatzione e de is istrumentos chi s’IA ponet oe a disponimentu de sa didàtica: dae su suportu a s’istùdiu a sa produtzione de càbidos, finas a is modalidades noas de imparu e de insegnamentu chi sunt naschende gràtzias a is tecnologias digitales.
No at a mancare un’arresonu in contu de su mundu de su traballu in su benidore, de is professiones chi sunt mudende e de is cumpetèntzias noas chi su merdadu, sempre prus cunditzionadu dae s’innovatzione tecnologica, pedit immoe a is giòvanos chi sunt in chirca de impreu.
S’IA, difatis, non rapresentat isceti una disfida tècnica, ma fintzas unu disafiu culturale e sotziale chi semper de prus at a influire un is relatziones umanas, in sa comunicatzione e in s’organizatzione de sa vida de cada die .
Atividade realizada cun su contributu de sa Regione Sardigna – IMPRENTAS 2025-2026. LR 22/2018, art 22. Attività realizzata col contributo della Regione Sardegna – IMPRENTAS 2025-2026. LR 22/2018, art. 22
