Sàbadu 8 e domìniga 9 amus – chie b’andat – a votare pro sas eletziones europeas. E in Sardigna – ma in 27 Comunes ebbia – b’ant a èssere finamentas sas amministrativas. Election day, duncas, diada eletorale cun sos livellos su prus a curtzu e su prus a tesu ghetados a pare ue sa cosa cumbinat.
Comintzende dae su prus a curtzu, sos logos in ue devent rinnovare sas assembleas consiliares locales custos sunt: Biddamanna Strisàili, Biddanoa Monteleone, Bosa, Câdesédda, Calteddu, Casteddu, Fìgari, Geroni, Guasila, Illorai, L’Alguer, Magumadas, Onanie, Ortueri, Pauli, Potuvigari, Samatzai, Santanna Arresi, Santu ‘Èngiu, Sarule, Sàssari, Serrenti, Sini, Sìnnia, Sorradile, Sossu e Stersili.
Naturale chi sa mirada de s’ogru est ghetada mescamente pro sos comunes de Casteddu e de Tàtari, cun su primu chi nos mustrat cantu fiat funtzionale a sa candidadura issoro sa torrada a bachile de Massimo Zedda (in su campu largu a pustis de èssere istadu finas a s’ùrtimu cun Soru, boghende·nde·li posca firmas e votos) e sa de Alessandra Zedda (chi fiat minetzende finas a s’ùrtimu de cùrrere sola).
Fintzas in Tàtari b’est su campu largu cun sos pentisteddados oramai diferentes dae sos chi fiant sos de Maurilio Murru, in majoria cun sa dereta tzìvica de Nanni Campus (chi non si torrat a presentare). A dereta b’est sa candidadura de su retore universitàriu Gavino Mariotti, indagadu in sa chistione Monte Nuovo ma interessadu dae sas indàgines in antis chi lu candidarent.
In Europa, imbetzes, pro more de una partzimenta tzircuscritzionales in favore de sos candidados sitzilianos, no l’ischimus si bi nd’amus a sètzere de sardos. Semper e cando sunt 11 sas listas chi – in totu sas biddas e tzitades de Sardigna – amus a agatare in s’ischeda: Alleàntzia birdes e manca (Avs); su movimentu a 5 isteddos (M5S); sos frades de Itàlia de sa presidente de su Cussìgiu (FdI); su partidu democràticu (Pd); sa Lega; sos istados unidos de Europa cun Renzi; sos de Calenda; s’ammesturu Nord Sud (Libertà) de De Luca; sa columba de Santoro cun sa trìbide paghe-terra-dinnidade; sos de Berlusconi (FI e riformadores); Alternativa popolare.
Attività realizzata col contributo della Regione Sardegna – IMPRENTAS 2023-2024. LR 22/2018. Atividade realizada cun su contributu de sa Regione Sardigna – IMPRENTAS 2023-2024 LR 22/2018
