Su in antis de sa crèsia de Santu Sebastianu in Brebì at a divenire unu palcoscènicu pro sa prima editzione de Cadiras in Pratza – A Public Stage for Contemporary Voices, rassigna culturale promòvida dae s’assòtziu Bisos de Janas.
Oto seros de addòbios, dae su 11 de su mese de trìulas a su 31 de austu (semper a sas oras 21), ant a animare s’istiu de su tzentru barbaritzinu cun paràulas, mùsica, teatru e momentos de riflessione.
“Cadiras in pratza” torrat a cramare unu gestu universale pro meda gente, cussu de si sèdere in paris pro ascurtare, contare e creare comunidade. Unu sèberu chi bolet rivendicare una dimensione culturale comente una pràtica fitiana capatza de fàghere dialogare generatziones e limbàgios diferentes.
Su cartellone si cumponet de ispetàculos teatrales, leturas, cuntzertos e performance cuntemporàneas.
Sos artistas de Cadiras in pratza:
Sabrina Mascia e Andrea Meloni cun Plumpy – La memoria della fame (Teatru Laboratòriu Alkestis), Giacomo Casti e Arrogalla cun unu reading-cuntzertu dedicadu a Antonio Gramsci, Pierpaolo Piludu e Enrico Frongia cun petzos tràidos dae Pòsidos, Cannasas Teatru cun 1974–2024: cRISATE di mezza età, Rita Atzeri e s’arpista Chiara Vittone cun unu recital subra de Joyce Lussu, Monica Zuncheddu e Matteo Pastorino cun Mare e radici, Maria Loi e Daniele Di Bonaventura cun un’iscritu teatrale de su contu Araj Dimoniu de Sergio Atzeni, Silvano Vargiu e Samuele Cabras cun Leggeri come acqua che scorre, ispiradu a Passavamo sulla terra leggeri.
Cada addòbiu s’at a serrare cun unu momentu abertu a su pùblicu, pro ammaniare sa partetzipatzione in un’atmosfera informale.
