Tres dies dedicados a sa cultura, a sa poesia, a s’emigratzione e a is traditziones de sa Sardigna. Dae su 10 a su 12 de argiolas, Orune acasàgiat sa de IV editziones de “Poetas e emigrados”, manifestatzione ammaniada dae su Comunu de Orune paris cun s’Assòtziu Culturale Sardu Shardana e cofinantziada dae sa Fondazione di Sardegna. S’initziativa contat fintzas subra su contributu s’Unione de is Comunos de su Mont’Albo, su GAL Nuorese Baronia, su Parcu Naturale Regionale de Tepilora, su CEAS Orune, sa cooperativa LARCO, sa FASI, sa Pro Loco Oronou APS e àteros assòtzios culturales e folklòricos.
S’editzione 2026 proponet unu programma mannu chi ponet a pare momentos de meledu culturale, música, identidade e valorizatzione de su patrimòniu materiale e immateriale de sa Sardigna.
Sa manifestatzioneinghitzat chenàbura su 10 de mese de argiolas, a is 19.00, in is Giardinos de Domo de is Murgias, cun su cunvegnu-ispetàculu “A dieci anni dalla morte di Pinuccio Sciola, la grande sinfonia della natura”, un’omàgiu a su famadu iscultore sardu. Intervenint is maistros Giacomo Monica, Fabio Ognibeni e Gavino Murgia, cun momentos musicales a contivìgiu de su Coro San Romedio.
Sa die de sàbadu 11 de argiolas at a cumintzare a s’arbeschidòrgiu, a is 5.30, in Monte Sant’Andra, cun su cuncertu “Aspettando l’alba”, torra cun Giacomo Monica e Gavino Murgia. A is 10.30, in sa Biblioteca comunale, apuntamentu cun su cunvegnu intregadu a s’emigratzione sarda, cun is saludos de s’Amministratzione comunale e unu momentu de aprofundimentu pro chistionare de is temas prus importantes de sa manifestatzione.
A su sero, a is 19.00, in sa Crèsia de Santa Maria Maggiore, in programma ddoe est su cuntzertu traditzionale de is coros, cun sa partecipatzione de su Coro Montecastello de Parma, de su Coro San Romedio de Romeno, de su Coro Lizera de Orune e de su Tenore Nunnale e Tenore Sant’Andria, chi ant a ofèrrere a su pùblicu unu momentu importante de iscàmbiu intre diferentes realidades corales.
Sa manifestatzione agabbat domìniga su 12 de argiolas. A mangianu est in programma fintzas una bisita ghiada a s’àrea archeològica de Sant’Efis, mentras a pustis de mesudie, in is Giardinos de sa Domo de is Murgias, si faghet sa tzerimònia de premiatzione de su cuncursu literàriu “Poetas e emigrados”, dedicadu cust’annu a su tema “Rimas de luche – Rime di luce”, chi cun sa partecipatzione de poetas de totu sa Sardigna cun òperas in limba sarda.
Sa manifestatzione si serrat cun una manna festa in Pratza Santa Maria Maggiore, cun ballos in pratza acumpangiados dae sa música de Gianluca Chessa, Nicola Goddi e Franco Corrias.
De non pèrdere fintzas àteras duas initziativas chi ant a arrichire su programma. Chenàbura s’11 de argiolas, sa Pro Loco Oronou APS, organizat s’escursione “Sul sentiero del granito… Alla scoperta delle cave di Su Montanesu”, unu percursu intre is cavas antigas de granitu cun relatos in contu de sa vida e de su traballu de is cavadores, arrichidu dae sa testimonia istòrica de tiu Pulista. S’addòbiu est pro is 7.30 in s’ingrugiada de Unertore, cun partèntzia a pè a is 8.00. Is organizadores cunsìgiant de si presentare cun bistimenta còmoda e cosìngios de trekking.
Àteru eventu collaterale, sàbadu su 12 de argiolas, su “Superpalio Orunesu”, organizadu dae s’Assòtziu Beata Vergine del Carmelo. S’apuntamentu est a is 16.30 in sa localidade Su Cossolu. A s’agabbu de s’eventu, essida de is màscaras traditzionales e cùmbidu in Pratza Remigio Gattu, cun ballos e cantos animados dae Gianluca Chessa e Paolo Canu.
Atividade realizada cun su contributu de sa Regione Sardigna – IMPRENTAS 2025-2026. LR 22/2018, art 22. Attività realizzata col contributo della Regione Sardegna – IMPRENTAS 2025-2026. LR 22/2018, art. 22
