Est in edìcola su nùmeru nou de Topolino, chi tzèlebrat sa Sardigna cun un’istòria dedicada a sos Gigantes de Mont’e Prama, sas famadas istàtuas nuràgicas de Crabas. Custa istòria, a tìtulu “Il mistero dei giganti,” est istada creada dae duos autores sardos de cabbale: Bruno Enna e Luca Usai.
“Dae oe austu, e finas a martis chi benit, in su n. 3585 de Topolino essit un’istòria dedicada a sa Sardigna e a sos Gigantes de Mont’e Prama,” at iscritu su fumetista Luca Usai in sas retes sotziales. “Sos testos sunt de Bruno Enna, sos disinnos e sa supervisione de sos colores sunt meos, cun sa coloratzione de Manuel Giarolli. Gràtzias meda a Nadia Canu, chi nos at sighidu dae su cumintzu cun impòsitos e documentatziones pretzisas e puntuales comente un’archeòloga ebbia podet fàghere. Ispero chi su resurtadu bos pragat e chi si resessat a leare a su mancu unu pagu su nuscu de sa terra nostra.”
S’istòria, chi s’isvilupat in 48 pàginas aiat partzida in duas partes, tenet comente protagonistas Topolino, Minni, Pippo e su professore Zapotec in una ventura chi los at a giùghere a biagiare intre su presente e su tempus coladu, finas a unu bidditzolu nuràgicu de sa Sardigna de sa fine de s’Edade de su Brunzu. Su sugetu e s’iscenegiadura sunt òpera de Bruno Enna, mentras sos disinnos sunt istados realizados dae Luca Usai, connotu fintzas pro àere pintadu a Carlo Conti in fumetu in un’istòria dedicada a su Fèstival de Sanremo.
Bruno Enna contat chi s’idea pro s’istòria est nàschida belle pro cumbinatzione durante una cunversatzione cun s’archeòloga Nadia Canu, ex diretora de sa Fondazione Mont’e Prama. Disigende un’autentitzidade visiva a su contu, Enna at chertu interessare un’àteru autore sardu, Luca Usai.
Usai at postu a notu comente sas chircas fatas pro sa realizatzione de s’istòria siant istrada fatas cun coidadu meda, gràtzias fintzas a s’agiudu de Nadia Canu, chi at permìtidu a sos autores de bisitare su museu e los at agiudados in sas chircas issoro. S’istòria est arrichida dae artìculos redatzionales e dae un’intervista a s’archeòloga etotu.
–
Attività realizzata col contributo della Regione Sardegna – IMPRENTAS 2023-2024. LR 22/2018. Atividade realizada cun su contributu de sa Regione Sardigna – IMPRENTAS 2023-2024 LR 22/2018
