B’at carchi nova chi nos interessat pro su chi pertocat s’esploratzione de sa luna e de s’ispàtziu gràtzias a su potentziamentu de su Sardinia deep space antenna. Su tzentru de s’Agentzia ispatziale italiana, integradu in una paràbola de 64 metros de su Sardinia radio telescope in Santu Asili de Monti, est connoschende una fase manna de espansione infrastruturale.
Sa punna primària est sa de garantire su ponte ràdio permanente pro sas missiones umanas e robòticas imbenientes conca a su satèllite de sa terra nostra e sas làcanas de su sistema solare. Su pianu nou de isvilupu, sustènnidu dae sos fundos de sa presidèntzia de su Cussìgiu de sos ministros, at a permìtere sa realizatzione de unu tzentru modernu de elaboratzione de datos, laboratòrios tecnològicos e architeturas hardware e software a s’avanguàrdia.
De sas innovatziones crae cherent contados sos sistemas pro sa gestione ridondada de s’iscala de tempus locale e sas prataformas pro su controllu e su compudu de sas operatziones. Custos agiornamentos ant a artziare sas prestatziones de su situ, permitende·li de operare cun efitzèntzia màssima a costàgiu de sas retes internatzionales Deep space network de sa Nasa e Estrack de s’Esa.
In su matessi tempus, su tzentru est in pessu lòmpidu a unu traguardu fundamentale: s’acumprimentu de su programma Emm Delivery M4 in intro de su progetu ‘Earth, Moon and Mars’, finantziadu dae su Pnrr. Su chiu de su programma, giutu a dae in antis in sinergia dae s’Agentzia ispatziale italiana, dae s’Istitutu natzionale de astrofìsica e dae su Cnr, est s’isvilupu de sos protòtipos iscientìficos e de sos sistemas de comunicatzione pro sa base lunare italiana benidora. Custu resurtadu cunfirmat su ruolu tzentrale de su polu sardu in sa filera aerospatziale natzionale e internatzionale, dimustrende su bonu de sa cooperatzione.
Atividade realizada cun su contributu de sa Regione Sardigna – IMPRENTAS 2025-2026. LR 22/2018, art 22. Attività realizzata col contributo della Regione Sardegna – IMPRENTAS 2025-2026. LR 22/2018, art. 22
