In contu de regorta diferentziada de sa plàstica est crisi continentale, ma est como chi semus comintzende a la vìvere inoghe cun sos avisos de sos Comunes chi, in pagas paràulas, nos sunt narende de nos la tènnere in domo.
Totu est movende dae una crisi de sa filera de su ritziclu cajonada dae s’invasione de su mercadu dae parte de sa plàstica vìrgine – su polìmeru puru derivadu dae su petròliu – prodùida in sos mercados asiàticos cun costos prus chi non bassos.
Pro custu est chi custa plàstica vìrgine est prus vantagiosa de sa ritziclada; pro custu est chi sas indùstrias reduint sos achistos de materiale rigeneradu. Su resurtadu est chi sa cantidade de plàstica cunferida dae sos Comunes a sos impiantos sardos est prus arta de sa dimanda, provochende sa crisi de sos magasinos de istocàgiu.
Prataformas comente sa So.ma.Ricicla de Assèmini, chi pressant su materiale pro contu de Corepla, sunt custrintas a serrare sos cantzellos pro resones de seguridade. Sena una essida conca a sos tzentros de recùperu, sas impresas locales bident blocada s’operatividade e azerados sos ricavos, cun su discumbèniu chi est interessende sas utèntzias.
Pro cuntènnere s’emergèntzia, sa Regione e sos sìndigos ant individuadu àreas de istocàgiu provisòrias in Terranoa e in su Tecnocasic. Ma sunt rispostas temporàneas, palliativos chi non isorvent s’imbòligu. Diat pàrrere chi sa ratio estrema siat sa de nche giùghere sa plàstica diferentziada a sos furros. Una solutzione chi faghet a cantzos sos printzìpios de s’economia tzirculare, chi at a ingendrare emissiones mannas de anidrìde carbònica fòssile e chi at a fàghere nàrrere a sos tzitadinos: «chie nos lu faghet fàghere a diferentziare».
Est una crisi, custa, chi torrat cun maicantos passos a dae in segus. E no est pedende a sa gente de no impreare plàstica – lassende a su mercadu campu lìberu – chi nd’amus a essire.
Atividade realizada cun su contributu de sa Regione Sardigna – IMPRENTAS 2025-2026. LR 22/2018, art 22. Attività realizzata col contributo della Regione Sardegna – IMPRENTAS 2025-2026. LR 22/2018, art. 22
