Ant annunciaus is bincidoris de su Prèmiu BìFoto 2026, su cuncursu internatzionali organizau de s’assòtziu chi ònnia duos annus scioberat tres progetus fotogràficus destinaus a intrai a fai parti de su percursu de su Festival Internatzionali de sa Fotografia in Sardigna, ocannu in programa in Mòguru su 10 e s’11 de ladàmini.
S’editzioni 2026 de su Prèmiu at registrau candidaduras chi bènint de ònnia parti de su mundu, cunfirmendi un’interessi chi crescit po su Festival e po su cuncursu suo.
Is tres progetus scioberaus funt Drifting Shadows: Space Debris de s’italiana Fiorella Baldisserri, Arasaig (Safe Place) de su svìtzeru Alfio Tommasini e We Still Have the Soul de s’ispagnolu Luis Casadevall. Sa giuria at donau puru una Mentzioni Speciali a su fotògrafu sudcoreanu Seunggu Kim po su progetu Better Days.
S’annùnciu de is bincidoris tenit unu significau de importu mannu ca arribat a pagas diis de sa morti de Francesco Guccini, cantautori de “Dio è morto”, su branu scioberau comenti filu chi ghiat sa de XVI editzioni de su BìFoto Fest.
Una cantzoni chi, a sessanta annus de candu est essida, sighit a fai pensai gràtzias a una riflessioni a pitzu de sa crisi de is valoris, de su disincantu e de sa possibilidadi de torrai a nàsciri.
Is contus intre de ambiente, identidadi e resistèntzia. Is progetus bincidoris contant tres argumentos diferentis cun sa matessi voluntadi de arresonai a pitzus de su tempus nostru. Drifting Shadows: Space Debris arresonat a pitzu de sa chistioni de is arrastos spazialis e de sa responsabildiadi de s’òmini po s’ambiente de s’ària, furriendi su celu in una metàfora de sa memòria e de sa cura.
Arasaig (Safe Place) circat invecis su significau de “logu seguru” gràtzias a unu biàgiu in is Highlands e in is ìsulas de su nord de sa Scòtzia, intre de paisàgiu, spiritualidadi e sensu de apartenèntzia.
We Still Have the Soul, frutu de prus de 12 annus de traballu in L’Avana, donat un’imàgini de sa sotziedadi cubana, contendi comenti, puru in is logus prus fragilis, dignidadi, umanidadi e ispera potzant sighiri a bìviri.
Is òperas bincidoras ant a èssiri produtas e amustradas in sa de XVI editzioni de su BìFoto Fest, intrendi a fairi parti de su museu fotogràficu a celu abertu chi de su 2018 furriat su tzentru stòricu de Mòguru in unu percursu de mustra permanente cun prus de 400 fotografias.
Atividade realizada cun su contributu de sa Regione Sardigna – IMPRENTAS 2025-2026. LR 22/2018, art 22. Attività realizzata col contributo della Regione Sardegna – IMPRENTAS 2025-2026. LR 22/2018, art. 22
