Oe est una die istorica po s’Euròpa. Difatis faghet trinta ànnos dae cando, su noe de su mese de santandria de su 1989, est ruidu su muru de Berlinu chi tando partziat sa Germania intre duas partes: Est, s’ala de s’Urss, e Ovest controllada dae sa Republica federale.
Fiat aici dae su 1961, su muru fiat istadu artziadu po no fait andare sa gente dae una banda a s’àtera de s’Euròpa. In su tempus de sa Guerra Fredda fiat su sìmbulu de sa ‘cortina di ferro’, sa lìnia chi marcaiat sa làcana intre su mundu gubernadu dae s’Unione Sovietica e cuddu chi fiat filu-americanu.
Dae su 1961 a su 1989 su mundu fiat acanta a sa de tres guerra mondiale, su disafiu intre Urss e Usa fiat mannu a beru e po sa gente chi bìviat in Euròpa su pessamentu mannu. In sa Germania Est non nche fiat sa libertade chi nche fiat in is àteros Istados europeos: no podìant propassare su muru, pro narrere, e andare dae s’àtera parte.
Finas a cando, su 9 de su mese de santandria 1989, sa Germania Est aiat annuntziadu chi diat èssere istadu possibile. Tando chentinas e chentinas de persones si nche fiant atòbiadas a in antis de su muru pro ddu brincare. In sas dies imbenientes su muru fiat istadu ghetau a terra.
