Una lege pro promòvere sa limba de sos sinnos. Su Cussìgiu regionale de sa Sardigna at aprovadu a s’unanimidade una proposta chi punnat a promòvere sa difusione de sa limba de sos sinnos italiana e de sa limba de sos sinnos italiana ‘tattile’ in sas atividades de comunicatzione e de informatzione de sos canales televisivos pùblicos e privados de s’ìsula.
Su provedimentu, finantziadu cun 2 milliones de èuro a s’annu pro su 2023 e su 2024, previdet puru de sustentare s’inclusione iscolàstica e de traballu de sas persones surdas e interventos de formatzione, “pro crèschere sa consièntzia subra de sas problemàticas ligadas a sa disabilidade de s’udidu e a favorire sa difusione de sa limba de sos sinnos e de ogni àteru istrumentu, fintzas tecnològicu, pro fàghere sa comunicatzione prus fàtzile”.
Sunt istadas prevìdidas finas atividades pro favorire s’atzessu a sos servìtzios pùblicos, a sos eventos, a s’informatzione, cun s’obietivu de cunsentire a sas persones surdas sa partetzipatzione a sa vida polìtica. In fines, s’intervenet fintzas pro canto pertocat sa sanidade, cun controllos pro sa diàgnosi de sas maladìas, s’istitutzione de grupos de mèigos chi potzant sighire a sas persones cun disabilidade.
“Unu testu – su cummentu de Michele Pais, presidente de su Cussìgiu regionale – chi at a contribuire a creare una sotziedade prus atzessìbile in sa famìlia, in s’iscola, in sas istitutziones, in sa comunidade e in sos servìtzios pùblicos. Oe pro nois est una die importante chi isetaìamus dae tempus”.
Atividade realizada cun su contributu de sa Regione Sardigna – Imprentas 2021-2022. Lr 22/2018, art. 22
Attività realizzata col contributo della Regione Sardegna – IMPRENTAS 2021-2022. LR 22/2018, art. 22
