Sa nova no est noa, in contu de curas est semper artu su nùmeru de is tzitadinos chi nde faghent a mancu. Sos datos los at presentados su presidente de s’Istat Francesco Maria Chelli su 7 de santandria in s’auditzione pro sa Manovra finantziària in sas cummissiones parlamentares de su Bilantzu.
S’annu coladu, su 2024, su fenòmenu at interessadu un’italianu cada 10 pro more de sas listas de isetu tropu longas e de sos costos prus chi no artos. Totu custu mancari sa Costitutzione nàrgiat chi sa salude est unu diritu fundamentale pro sa persone e pro sa colletividade.
In Sardigna su datu est finamentas peus sende chi est belle unu sardu de chimbe su chi non podet ricùrrere a custu diritu (su 17.2%). De prus, su datu est peus de su de s’annu in antis: su 2023 sa pertzentuale fiat de su 13,7%. Su paragone cheret fatu cun su 6,9% de su nord Itàlia, cun su 7,3% de su tzentru e cun su 6,3% de su meridione.
Est craru chi su tema de sa sanidade sighit a èssere su prus de importu in contu de polìticas regionales. Su problema est chi de custa tendèntzia si nde faeddat dae medas annos sena chi s’intrèveru de sas Giuntas regionales apat mudadu sa situatzione.
Semper cunforma a sos datos Istat (custos de su mese de abrile) e movende dae cantu previdet su cuntratu colletivu natzionale de su setore, in Sardigna diamus dèvere àere 1400 dotores de meighina generale, ma nde mancant 500 e cun is chi si nch’andant in pensione su nùmeru sighit a crèschere.
A is chi b’abarrant, mescamente in sos tzentros prus mannos, lis tocat a sighire fintzas 1800 patzientes cando chi su lìmite est de 1200 (e prus biddas in sas zonas de intro). In sa Barbàgia e in su Mandrolisai b’at 12 biddas chi non b’at nemmancu pediatra.
Fintzas custu contribuit a determinare sa tzifra sarda, chi in tzertos tretos est fintzas prus arta: in su Sulcis sa pertzentuale de sas rinùntzias nche lompet a cuota 20.
Attività realizzata col contributo della Regione Sardegna – IMPRENTAS 2024-2025. LR 22/2018. Atividade realizada cun su contributu de sa Regione Sardigna – IMPRENTAS 2024-2025 LR 22/2018
