Su Comunu de Ulassa at presentadu in custas dies su calendàriu culturale 2025 – a tìtulu “Ulàssai: ue sa natura addòbiat s’arte”-, unu progetu ammaniadu in collaboratzione cun sa Fondazione Stazione dell’Arte e contivigiadu dae s’istòricu de s’arte Marco Peri.
S’initziativa est finantziada dae sos fundos de su PNRR – NextGenerationEU e si tenet sa punna de trasformare sa bidda de is Tacus in unu laboratòriu artìsticu permanente, fundende su genius loci cun s’eredade immateriale lassada dae s’artista sarda prus istimada e connota in su mundu, Maria Lai.
Su coro de su progetu at a èssere su diàlogu intre arte cuntemporànea e paisàgiu, pro mèdiu de, interventos de restàuru e oportunidades formativas, in un’òtica de rigeneratzione culturale e sotziale. Tra sos eventos prus de importu, sa mustra cuncordada in su CaMuC e in s’Istatzione de s’Arte “Miró incontra Maria Lai. Il fascino della sorpresa”, in programa dae su 12 de abrile a su 29 de làmpadas 2025, in ue sas òperas de su mastru catalanu benit acostagiadas a sas de s’artista ogiastrina. Sa mustra, contivigiada dae Lola Durán Úcar e dae Marco Peri etotu, si proponet de pònnere in comunicatzione duas bisiones poèticas e simbòlicas de su mundu, gràtzias a òperas de colletziones privadas de sa Catalugna e de sas Baleares.
Su percursu espositivu sighit cun “La vista non è ancora sguardo”, chi dae su 5 de trìulas a su 29 de santandria at a ofèrrere unu cunfrontu intre sa colletzione de s’assòtziu Genesi e sas òperas de Maria Lai, aprofundende su tema de sa mirada e de s’interpretatzione visiva cun artistas cuntemporàneos de respiru internatzionale. Ancora, b’at a èssere sa Biennale de Arte Cuntemporànea, in programa su 2 de làmpadas e curada dae Gianni Murtas, cun sa partetzipatzione de 23 giòvanos artistas italianos mutidos a dialogare cun s’eredade culturale lassada dae Lai e cun su paisàgiu “ultraterrenu” de Ulassa.
In su programma però non b’at mustras ebbia, ma fintzas unu progetu de cunservatzione e valorizatzione de su patrimòniu artìsticu e urbanu de Ulassa. Sìmbulu de custu acostamentu est su restàuru de su “Muro del Groviglio”, un’òpera pùblica de Maria Lai, torrada a sa bellesa antiga sua e inaugurada su 10 de santandria, a testimonia de sa voluntade de su Comunu de custoire e rèndere atzessìbile su patrimòniu culturale suo.
In su matessi momentu, su comunu ogiastrinu at aviadu cursos formativos e bandos pro giòvanos espertos in sa progetatzione culturale, pro more de generare oportunidades professionales presas noas in su territòriu. De custa manera, Ulassa si proponet comente modellu virtuosu de comunidade chi investit in sa cultura pro afortiare su sentidu de apartenèntzia, agiudare s’economia locale e costruire unu benidore cumpartzidu.
Attività realizzata col contributo della Regione Sardegna – IMPRENTAS 2024-2025. LR 22/2018. Atividade realizada cun su contributu de sa Regione Sardigna – IMPRENTAS 2024-2025 LR 22/2018
