Est possìbili chi una lingua sarvit una vida? Est possìbili chi is fueddus chi si ant imparau, in segretu, contra de dònnia lei, siant s’ùnicu atu de resistèntzia chi balit ancora calincuna cosa? Po donai corpus a custa dimanda, su grupu teatrali Artisti Fuori Posto portant in scena Nosus. Su 24 de maju de su 2026 a is 20 e 30 in su Teatru Màssimu de Casteddu, Sala M2, aintru de sa rassigna On Stage 2026.
Su spetàculu, patrocinau de sa Tzitadi Metropolitana de Casteddu e fatu cun s’agiudu de sa Regioni Sardigna, dd’ant ambientau in unu benidori distòpicu, in unu mundu chi at comporau sa paxi fendi pagai s’identidadi: linguas cantzelladas, arregordus interraus e un’intelligèntzia artificiali chi stabiliscit, finas de sa nàscida, si una persona meritat de bivi lìberu. In custu scenàriu, tres òminis s’agatant impari in un’aposentu aundi benint interrogaus e cussu aposentu divenit su logu aundi si decìdit chini seus diaderus, e ita seus dispostus a perdi po abarrai aici.
Nosus nàscit de unu sugetu cumpartziu de Filippo Salaris, Piero Murenu e Alessandro Pani, dd’ant scritu e interpretau in sardu e in inglesu. Sa scenegiadura originali est de Alessandro Pani, chi at iscritu su testu in is duas linguas.
Sa regia, narant, est su frutu de unu protzessu cundividiu intra de is tres artistas e si movit in su surcu de su printzìpiu de s’atori-regista elaborau de Juri Alschitz. Su spetàculu at a èssi acumpangiau cun sutatìtulus in italianu, pensaus non comenti una mediatzioni po fai is cosas prus fàcilis, ma comenti una manera po cumpartziri s’esperièntzia cun pùbblicus diferentis chentze rinuntziai a sa fortza, a su sonu e a s’identidadi de is linguas in s’iscena.
“A su centru de s’iscena, non su folclori, ma s’ispìritu arcàicu de sa Sardigna, cun sa fortza sua de is ritus e de s’identidadi, proietau in su benidori e mudau in calincuna cosa de nou chi ndi tenit frima sa potèntzia. Su spetàculu at castiau a sa traditzioni de Otzana – is Boes e Merdules“.
S’Assòtziu Boes e Merdules de Otzana at abertu is archivius suus e postu a disponimentu is caratzas originalis, chi Piero Murenu at torrau a interpretai a manera futurìstica e distòpica e s’artisanu digitali Andrea Cincotti at imprentau in 3D.
“Cumpletant s’universu visivu e sonoru de su spetàculu is scenografias imbentadas de is protagonistas etotu, is bestimentas de Alessandra Lecis e su disinnu de is luxis de Ivano Cugia. Is mùsicas originalis ddas at firmadas su musicista Michele Marescutti e tenint sa boxi cantada de Antonio Pani, unu de is poetas improvisadoris campidanesus prus de importu.
