Est una note longa sa chi amus a connòschere in contu de resurtados de sas eletziones europeas chi sunt interessende 27 paisos. Comente ischimus in Olanda ant giai votadu cando chi inoghe sos sègios los ant a serrare a sas 11 de note. Una bia sessadas sas operatziones de votu, pro cumprèndere ite cunformatzione at a àere s’emitziclu de Bruxelles, cada paisu at a publicare sos exit polls suos.
Totu sos datos nch’ant a lòmpere a sala imprenta de s’Europarlamentu in un ue b’ant a èssere prus de milli giornalistas dae 90 istados. Sende chi sas operatziones de votu non si serrant totu cantas a sa matessi ora sos primos exit polls – in prus de sos olandesos chi giai connoschimus – nos los ant a dare a ora de sas 21.30. Semus faeddende de sos de Polònia, Portugallu, Romania e Isvètzia.
Coladu mesunote ant a difùndere una prima idea de comente s’at a cumpònnere s’àula movende dae 25 resurtados provisòrios e 2 exit polls. Carchi cosa prus segura bi l’amus a àere prus a tardu, a pustis de sa una, cun datos prus a minudu de totu sos 27 paisos interessados.
Ammentemus·nos chi sa cumpositzione de su parlamentu movet dae grupos europeos cun in intro sos partidos natzionales, chi però ant conduidu una campagna eletorale prus interna chi non continentale (su prus de sas bortas comente referendum de iscumprou de sos sundàgios natzionales). E finamentas chi sa fortza de una famìlia polìtica in unu paisu non est sa matessi in un’àteru.
Duncas amus a bìdere totu in sa maratona eletorale ufitziale: deretu, in s’Eurocàmera, at a faeddare su cabu de grupu de su Ppe, Manfred Weber; fatu-fatu su visupresidente de su gruppo de sos sotzialistas, su portughesu Pedro Marques. Dae lunis amus a connòschere sa partzimenta definitiva de sos iscrannos, cun sas pertzentuales otènnidas, e bos l’amus a contare inoghe, in sardu.
Attività realizzata col contributo della Regione Sardegna – IMPRENTAS 2023-2024. LR 22/2018. Atividade realizada cun su contributu de sa Regione Sardigna – IMPRENTAS 2023-2024 LR 22/2018
