In sa note intre s’8 e su 9 de làmpadas, Sandro Arzu, 56 annos de Àrthana, s’est mortu a manu sua in sa galera de Uda, acanta fiat inserraddu dae prus pagu de unu mese.
L’aiant acapiadu su 26 de maju coladu a pustis de duos annos isbandiende, cun s’imputu de àere ochidu a Beniamino Marongiu, mortu in su mese trìulas de ocannu coladu in sa pratza printzipale de sa bidda ogiastrina. Arzu s’agataiat in isulamentu e at lassadu unu follu iscritu a manu pro pedire iscusa a sa famìlia e pro los discurpare, leende·si issu totu sa curpa de sas atziones suas. Su gestu, in prus de sighire a pònnere in tristura sa comunidade arthanesa, nd’at torradu a ischidare sa dibata chi pertocat sas cunditziones de vida in sas galeras italianas.
A bisu de su sindacadu Uilpa Politzia Penitentziària, su de Arzu est su de 33 suitzìdios acontèssidos in sos istitutos penitentziàrios italianos dae su cumintzu de su 2025. Unu datu chi non faghet a atzetare pro su segretàriu Gennarino De Fazio, chi at faeddadu de “unu beru apretu umanitàriu e istitutzionale”.
De prus, s’Uilpa at denuntziadu unu sistema “disisperadu”: prus de 16.000 detenutos in prus cunforma a sa càbida regulare e unos 18.000 agentes penitentziàrios de mancu. Nùmeros chi ponent a arriscu siat sa seguresa de sas guàrdias, siat s’amparu de sas persones prus fràgiles, comente sas sutapostas a isulamentu sena unu sustennu psicològicu comente si tocat.
Fintzas sa garante regionale de sas persones chitadas de sa libertade, Irene Testa, s’est chesciada de sa situatzione:
“Sa galera diat dèvere èssere unu logu de riabilitamentu, non de morte. Custu suitzìdiu ponet a notu chi sas istitutziones non sunt a tretu de garantire mancu unu presìdiu mìnimu de dignidade umana”, at decraradu a su Corriere della Sera.
Su matessi at naradu Maria Grazia Caligaris de s’assòtziu Sotzialismu Deretos Riformas chi at faeddadu de “un’àtera morte chi si podiat evitare”, solletzitende de averiguare sas cunditziones de su presone de Uda e un’afortigamentu de sos servìtzios sanitàrios e psicològicos.
Prus dìliga est sa cunditzione de sos cartzerados chi pro resones disciplinares, sanitàrias o cautelares s’agatant in isulamentu, sena raportos umanos e sena perunu agiudu de personale formadu. A totu custu s’annanghet un’àteru fatore determinante: s’impatu psicològicu de s’espositzione mediàtica. In Itàlia, medas bortas, in sos giornales, semper prus in chirca de tìtulos sensatzionalìsticos, benint postos in primu pàgina intertzetatziones e particulares de sas inghestas giuditziàrias a in antis de los averguare e fintzas a còstitu de sacrificare sa presuntzione de innotzèntzia. Custu protzessu mediàticu podet tènnere cunseguèntzias malas pro chie est giai fràgile, solu, suta pressione e chitadu de sa libertade.
Attività realizzata col contributo della Regione Sardegna – IMPRENTAS 2024-2025. LR 22/2018. Atividade realizada cun su contributu de sa Regione Sardigna – IMPRENTAS 2024-2025 LR 22/2018
