Afortiare sa collaboratzione polìtica e istitutzionale intre Sardigna e Còrsica pro afrontare paris is disafios de s’insularidade e tènnere una boghe prus forte in s’iscenàriu euro-mediterràneu. Est custu sa punna de sa motzione aprovada dae s’Assemblea de sa Còrsica chi proponet sa riativatzione de su Cussìgiu permanente sardu- cossu, organismu istituidu in su 2016 dae is assembleas de is duas ìsulas.
S’initziativa, promòvida dae sa truma polìtica Fà Populu Inseme, fortza printzipale natzionale corsicana e ghia de s’atuale guvernu de s’ìsula frantzesa, bolet torrare a promòvere unu percursu de cooperatzione fundadu in is ligàmenes istòricos, culturales, linguìsticos e econòmicos chi aunint Sardigna e Còrsica.
Intre is temas inditados comente prioritàrios ddoe sunt is trasportos, sa continuidade territoriale, s’energia, su costu de sa vida, s’atzessu a is servìtzios pùblicos, s’amparu de is limbas locales, sa cultura, s’ambiente, s’universidade, sa chirca e is polìticas europeas dedicadas a is regiones insulares.
Sa motzione previdit pro primu sa ripresa de is relatziones istitutzionales istruturadas intre is duas ìsulas, s’organizatzione de un’addòbiu intre s’Assemblea de sa Còrsica e su Cussìgiu regionale de sa Sardigna e sa promotzione de initziativas comunas in is setores istratègicos printzipales.
Su primu cummentu positivu pro custa detzisione est lòmpidu dae Franciscu Sedda, esponente de A innantis!, chi at ammentadu comente su Cussìgiu permanente siat nàschidu in una fase caraterizada dae sa presèntzia de fortzas natzionales e democràticas in is guvernos de is duas ìsulas.
«Cussu percursu oe sighit a pustis de duos annos de traballu intre is duos guvernos», at naradu Sedda, sutaliniende su ruolu acumpridu dae sa Presidèntzia de sa Regione Sardigna, dae su Comitadu de is Regiones de s’Unione Europea, dae sa Cummissione Ìsulas de sa Cunferèntzia de is Regiones Perifèricas Marìtimas (CRPM), dae is relativos assessorados de is Trasportos e de sa Mesa de su Cuirinale pro sa cooperatzione francu-italiana.
Segundu Sedda, su traballu fatu in is ùrtimos annos at permìtidu de torrare a fraigare raportos chi a pagu a pagu si fiant indebilitados durante sa legisladura regionale sarda 2019-2024.
Su Cussìgiu permanente sardu – cossu aiat giai prodùidu resurtados de contu in is primos annos de faina. In su mese de argiolas 2017, durante un’addòbiu in Lungone suta de sa presidèntzia de Jean-Guy Talamoni, tando presidente de s’Assemblea de sa Còrsica, e de Gianfranco Ganau, presidente de su Cussìgiu regionale de sa Sardigna, is duas ìsulas aiant aprovadu diversas initziativas comunas.
Tra is prus importantes, sa recherta de cumpartzimentu aèreos antintzèndiu, un’acòrdiu cuadru pro sa cooperatzione universitària intre is duos territòrios e una recherta congiunta a is istitutziones europeas pro su reconnoschimentu de sa cunditzione de insularidade, tema chi galu oe rapresentat una de is batallas printzipales de is duas ìsulas.
Su rilantzu de su Cussìgiu permanente arribbat a unu su momentu chi Sardigna e Còrsica chircant de afortiare su ruolu issoro in su Mediterràneu e in is polìticas europeas dedicadas a is regiones insulares. S’obietivu comunu est trasformare sa bighinàntzia geogràfica e culturale in una collaboratzione istàbile e istratègica, capatza de tènnere una boghe in is sèberos natzionales e europeos in matèria de trasportos, isvilupu econòmicu e coesione territoriale.
