Torrat fintzas ocannu “Io leggo perché” s’initziativa in contu de libros e de iscolas chi a su presente interessat 4,2 milliones de istudiantes in totu s’istadu italianu, 28.285 iscolas, 350 asilos, 3.939 librerias.
Comintzada su 9 de santandria cun serrada su 17, custa maratona est organizada dae Aie (s’assòtziu italianu de sos editores) cun s’agiudu de su ministeru de sa Cultura (pro mèdiu de su Tzentru pro su Libru e sa Letura) in sinergia cun su de s’Istrutzione e de su mèritu.
Issos etotu narant chi #ioleggoperché est «s’initziativa natzionale de educatzione e promotzione de sa letura» e chi «gràtzias a s’energia, a s’impignu e a sa passione de maistros, librajos, istudiantes e editores, e de sa gente chi at contribuidu a sa resèssida, finas a como ant intregadu a sas iscolas prus de 2 milliones de libros noos chi oe afòrtiant su patrimòniu libràriu de sas bibliotecas iscolàsticas de totu Itàlia».
Comente funtzionat s’initziativa? Totu cantos podimus comporare unu libru in libreria pro lu donare a sas bibliotecas de sas iscolas gemelladas. A concruos de sa regorta, sos editores ant a contribuire cun unu nùmeru de libros che pare a su de sa donatzione natzionale cumplessiva, finas a unu màssimo de 100mìgia volumes, partzende·lu intro de sas iscolas chi b’ant pigadu parte.
Sos de s’Associazione Italiana Editori chi l’ant organizada narant chi, ocannu, «pro sa prima bia bi pigat parte prus de sa metade de sas iscolas italianas». Su progetu tenet sa punna de potentziare sas bibliotecas iscolàsticas.
«Unu progetu sotziale – leghimus – nàschidu pro rispòndere a sos bisòngios de libros noos dae parte de sas iscolas e chi, dae noe editziones, mobìlitat s’editoria, sas istitutziones, sos mèdios e sos tzitadinos pro una punna comune: fàghere nàschere bibliotecas noas in sas iscolas». In su situ finas s’elencu de sas iscolas e de sas librerias sardas chi aderint a s’initziativa.
–
Attività realizzata col contributo della Regione Sardegna – IMPRENTAS 2023-2024. LR 22/2018. Atividade realizada cun su contributu de sa Regione Sardigna – IMPRENTAS 2023-2024 LR 22/2018
