Sa Regione bolit fairi una cumpangia aerea sarda po assetiai su problema de sa continuidade territoriale. Bolit sìghiri s’esempiu de sa Corsica chi dae su 1990 tenit Air Corsica, una flota de aèreos naraus de bandera.
Sa proposta po immoi est prus un’idea chi s’assessorau de sos Trasportos est valutendi ma s’intendint giai boxis arrennegadas. Su sindacadu de sa Fit Cisl, po nai, chi in nd’una nota de imprenta firmada dae su segretario regionali Valerio Zoccheddu at definiu sa flota aèrea sarda (su nomini diat depiri essi Air Sardinia) unu trèulu mannu pro sa Regione cajonendi aici una briga cun sa vicepresidente de sa Giunta, Alessandra Zedda.
“Annuncios de aici podint tènni cunsighèntzias lègias meda, comente s’esperièntzia disastrosa de sa Flota sarda de is navis. Sa Sardigna – sutalìniat Zoccheddu – teniat una cumpangia aèrea sarda: si mutiat Alisarda, fundada in su 1963 dae s’Aga Khan chi s’est fatu càrrigu po dexennios de garantiri sos collegamentos de s’Ìsula cun su continente”. In su tempus Alisarda est dibennia Meridiana e immoi est Air Italy (po su 49% de sa Qatar holding). “Po ita sa Regione, cando nci fiat s’ocasione, no est intrada in su capitale de sa sociedadi noa?” dimandat Zoccheddu.
Po Zedda invecis “is cunsighèntzias, pro sos sardos e pro s’issos diritu sacrosantu a sa mobilidade, s’ant a tenni si carchi sindacadu at a sighire a bìvere in su passadu sustentende mollos de continuidade territoriale bincios de s’istòria. Eus fatu una proposta – narat – e fait parti de un’atra pariga chi seus istudiendi cun s’isperu de aere contribudos, fintzas crìticos, po agatare unu caminu chi potzat fai essiri sa Sardigna dae sa conditzioni de svantagiu. Chini rapresentat is traballadores diat dèpere impreare un’acostamentu po dialogare, no po fai polemica”.
Dae ònnia manera, cussu de sa continuidade aerea est unu problema mannu chi pertocat dae unu cantu su diritu de is sardos a moviri a foras de s’ìsula, dae un’atru cantu sas cumpangias aèreas chi pedint dinai in prus po garantiri is cullegamentos in nd’unu mercau chi no diat èssi vantagiosu.