Unu biàgiu in s’archeologia, in sa natura e in sa limba sarda. Est custu s’ispìritu de “Fueddaus e faeus”, su documentàriu nou cuncordadu dae s’Isportellu de sa Limba Sarda de Ìsili, unu progetu chi punnat a contare e a avalorare s’identidade de su Sarcidanu e de sa Barbàgia de Seulu. S’òpera, prodùida in intro de is fainas prevìdidas dae s’Ufìtziu Limba Sarda de su Sarcidanu-Barbàgia de Seulu, est finantziada dae su bandu TuLiS 2024 de sa Regione Autònoma de Sardigna (L. 482/1999, LR 22/2018), e naschet cun s’obietivu de difùndere su sardu pro mèdiu de unu contu chi aunit ambiente, istòria e cultura. Is comunos interessados sunt Ìsili (ente capufila), Scroca, Stersilu, Geroni, Xrexei, Nuragus, Nuradda, Arroli, Sàdili, Serri, Seulu e Biddanoa ‘e Tulu.
Su documentàriu proponet imàgines dèchidas de is logos prus ammajadores de su territòriu: dae su padente de Addolì a is cùcuros sagrados de Monte Santa Vitòria, coro ispirituale de sa Barbàgia de Seulu. Non mancant is tretos prus ispantosos de su Sarcidanu, cun is paisàgios abertos suos, is sitos archeològicos e su patrimòniu materiale e immateriale suo. Su documentàriu est partzidu in 12 vìdeos de unos 3 minutos chi allegant de is sitos archeològicos, crèsias, museos, logos naturalìsticos cun imàgines originales acumpangiadas dae sa boghe in sardu e italianu de s’operadore culturale Francesco Deplano.
Su Sportellu de sa Lìngua Sarda de ìsili tando, cun custa faina, bolet sensibilizare is generatziones noas in contu de s’importu mannu chi tenet s’amparu e s’avaloramentu de sa lìngua sarda e de su patrimòniu immateriale, agiudende a fàghere connòschere custos logos fintzas foras de s’ìsula nostra.
Su documentàriu est disponìbile a indonu in su canale YouTube dedicadu e in sa pàgina FB de s’isportellu linguìsticu de ìsili.
