“Interpretare: dalla vita alla scena”. Atores sardos faghent letzione de tzìnema cun Valentina Carnelutti. Est istada una resessida sa masterclass de tzìnema chi s’est tenta domìniga in su teatru Adrianu de Casteddu organizada dae s’assòtziu culturale Babel cun sa diretzione artìstica de su regista Paolo Carboni.
Prus de binti sos atores e apassionados de s’arte tzinematogràfica chi ant leadu parte a s’eventu: pro medas de issos est istada ocasione de crèschida professionale de importu. Sa letzione, a indonu, fiat intregada a s’aprofundimentu de sas tècnicas interpretativas cun proas e recitatzione dae mangianu a sero.
Sa masterclass est istada organizada a intro de su Prèmiu Kentzeboghes, sustennidu dae s’assessoradu a sos Benes Culturales e Ispetàculu de sa Regione Sardigna e dae sa Fundatzione de Sardigna e est realizada cun s’a collaboratzione s’agiudu de: Sotziedade Umanitària de Casteddu – Carbònia – S’Alighera, Babel Film Fèstival, assòtziu culturale Rts – Radio Televisione Sarda, EjaTV, Areavisuale Film, Terra de Punt, Sardegna Film Commission.
Atoressa e iscenegiadora famada in Itàlia etotu, a Valentina Carnelutti prus bortas dd’ant candidada a su Nastru de Argento: pro su curtzumetràgiu “Recuiem”, pro “La pazza gioia” de Paolo Virzì e pro “Arianna” de Carlo Lavagna. At retzidu una candidadura comente sa mègius atoressa non protagonista a su David de Donatello e at bintu su “Corto d’argento” pro “Il regalo” de Alice.
At traballadu cun registas comente Marco Tullio Giordana, Enrico Pau, Theo Angelopoulos e Paolo Virzì. De reghente, dd’ant fata protagonista in “Margini” de Niccolò Falsetti (Venètzia 2022) e in “The Man Without Guilt” de Ivan Gergolet, acramadu dae sa crìtica e binchidore de su Mègius Film a su Bifest 2023. Como est impinnada in sa realizatzione de s’òpera sua prima, “Margherita”.
Attività realizzata col contributo della Regione Sardegna – IMPRENTAS 2024-2025. LR 22/2018. Atividade realizada cun su contributu de sa Regione Sardigna – IMPRENTAS 2024-2025 LR 22/2018
