Sighi∙nos

Salude, ite ses chirchende?

Cultura

Prèmiu Otieri, publicadu su bandu de sa de 65 editziones

B’at tempus finas a su 31 de maju pro pòdere pigare parte a su cuncursu literàriu nòdidu nàschidu su 1956 gràtzias a s’atza de su fundadore e primu segretàriu Toninu Ledda. Tres is setziones: poesia sarda; prosa sarda; tra poesia e càntigu. Su presidente Vittorio Ledda annùntziat fintzas «su comintzu de is traballos de classificatzione e de catalogatzione de totu is òperas de su Prèmiu»

Is poetas e is iscritores de Sardigna ant agatadu in s’ou de Pasca sa sorpresa chi fint isetende: su bandu de sa de sessantaghimbe editziones de su Prèmiu Otieri.

Su cuncursu literàriu nòdidu, nàschidu su 1956 gràtzias a s’atza de su fundadore e primu segretàriu Toninu Ledda, si torrat a presentare cun sa fòrmula rodada de is tres setziones dedicadas a sa paràula creativa in limba sarda, gadduresa, turritana, aligheresa e tabarchina.

Sa prima, intitulada a su linguista Antoni Sanna, est pensada pro sa “Poesia sarda” iscrita, in rima o mancu, cun argumentu lìberu (lìmite ùnicu su de is 40 versos); sa segunda, “Prosa sarda”, chi leat su nùmene de su fundadore illustre de su Prèmiu, pertocat is contos, non pius longos de chimbe pàginas A4 (corpus 12 e 2 centìmetros de oru); sa de tres, “Tra poesia e càntigu” in onore de s’improvisadore Antoni Cubeddu, est sa chi aunit is versos a su cantu poèticu tìpicu de sa traditzione sarda («nìnnidos, atìtidos, glossas, cantadas in lira, gosos, cantzones torradas, modas, modellos, mutos, repentinas etc.»).

Is iscritores, chi ant a pòdere partetzipare a totu is setziones (cun unu cumponimentu ebbia in ognuna), ant a dèvere imbiare su materiale issoro inèditu e mai premiadu o mentzionadu non pius a tardu de su 31 de maju.

Is òperas ant a pòdere èssere imbiadas a s’indiritzu info@premiozieri.it (inditende sa setzione in s’ogetu de su messàgiu) o impreende sa posta ordinària (cun sa setzione inditada in sa busta) cun s’imbiu de sa còpia a s’indiritzu “Segreteria de su Prèmiu Otieri de Literadura Sarda Via Ugo La Malfa, 28 – 07014 Ozieri (SS)”.

Is testos cherent iscritos a màchina o cun su computer e devent inditare is generalidades de s’autore (nùmene e sambenadu, data e logu de nàschida, indiritzu fìsicu e eletrònicu e cuntatos telefònicos). No ant a èssere ammissas poesias e contos anònimos o cun pseudònimos. Ant a èssere imbetzes de agiudu pagas rigas biogràficas e sa tradutzione in italianu (in alternativa unu glossàriu de is faeddos prus pagu connotos).

Sa giuria chi at a esaminare is cumponimentos dd’at a ghiare su Prof. Dino Manca acumpagnadu, finas ocannu, dae sa vitzepresidente Anna Cristina Serra e dae is giurados Cristiano Becciu, Antonio Canalis, Duilio Caocci, Clara Farina, Attilio Mastino, Riccardo Mura, Gianbernardo Piroddi, Simone Pisano, Gabriele Tanda, Salvatore Tola.

Custos is prèmios inditados in su bandu: un’assegnu de 500 èuros e una targa pro su primu de ogni setzione; un’assegnu de 300 èuros e una targa pro su segundu; un’assegnu de 200 èuros e una targa pro su de tres. Previstos finas unos cantos prèmios ispeciales.


Attività realizzata col contributo della Regione Sardegna – IMPRENTAS 2023-2024. LR 22/2018. Atividade realizada cun su contributu de sa Regione Sardigna – IMPRENTAS 2023-2024 LR 22/2018

De lèghere

Atualidade

«Emergèntzias e oportunidades» in sa mirada sua. Ma sos amministradores unidos sufrint sos sèberos de Casteddu e de Roma, in ue sunt partzidos

Isport

Ruju-biaitos in foras de sos play off

Isport

Su campione de s’ìpica sarda e italiana teniat 64 annos Su fantinu de Lanusè, classe 1960, si nch’est mortu giòbia su 23 de maju, pro...

Atualidade

Istrumada atzessìbile e segura comente diritu umanu fundamentale. Initziativa de sos tzitadinos europeos. Sa campagna “My Voice, My Choice” dat a is tzitadinos europeos...