Sàbudu 18 e domìnigu 19 torrat in Casteddu s’atobiu cun su progetu chi de su cabulogu de sa Sardigna s’est ammanniau ricendi medas Comunus a livellu natzionali: Monumenti Aperti.
Ant a essi 70 is monumentus abertus. Medas is volontàrius: 5.000 is studiantis chi arribant de 54 istitutus de scola, 44 is assòtzius chi ant a pigai parti po unu totali de prus de 5.500 personas de dònnia edadi: “Una comunidadi chi est su motori beru de sa manifestatzioni” sutalìniat su presidenti de Imago Mundi Massimiliano Messina.
Duncas ant a essi 70 is monumentus de visitai, intre is nous nci funt sa Diretzioni Generali de sa Protetzioni Civili de sa Regioni Sardigna, su Gilla Lab, su Padiglioni de su sali de su Parcu Nervi, su Cineteatru de Sant’Eulàlia, is fortinus militaris de su Parcu de Molentàrgius e sa Tzitadi de su Sali, sa Rapresentàntzia de su Guvernu in sa Regioni Sarda, su Teatru Carmen Melis e is laboratórius de su Parcu de sa Mùsica, sa turri de su campànili de sa Cattedrali e Villa Devoto cun sa Sala Giunta.
Torrant a si podi biri atrus 17 logus, intre de custus s’Auditorium Sergio Atzeni, s’àrea archeològica de su Tèmpiu pùnicu-romanu de viale Trento, sa crésia de Sant’Arènnera, sa Basìlica de Santa Gruxi, sa Caserma Amerigo Demurtas-Dipartimentu Militari de Mexina Legali, sa Fullònica de via XX Settembre, is oratórius de su Santìssimu Crociifissu e de is Ànimas Purgantis, chentze scaresci su Teatru Lìricu e su Teatru Màssimu.
Funt medas puru is initziativas de mùsica, spetàculu e arti propostas in totu sa tzitadi: su programma intreu, impari a sa lista de is logus de visitai, s’agatat in su situ de sa manifestatzioni, in sa noa App Monumenti Aperti e in sa ghia de paperi, chi s’at a podi agatai in is monumentus prus de importu e in is duus infopoint: in pratza Garibaldi e pratza Costituzione. No podiat mancai, a sa fini, s’agiudu de is canalis social ufitzialis.
Atividade realizada cun su contributu de sa Regione Sardigna – IMPRENTAS 2025-2026. LR 22/2018, art 22. Attività realizzata col contributo della Regione Sardegna – IMPRENTAS 2025-2026. LR 22/2018, art. 22
