Apustis chi dd’ant presentau in anteprima a sa de dexiseti editzionis de su Bari International Film&Tv Festival, su documentàriu Igor. L’eroe romantico del calcio, distribuiu de Piano B Distribuzioni, arribat a su cìnema cumentzendi de su 30 de martzu acumpangiau de su regista Luca Dal Canto.
Su documenàriu fait torrai su spetadori in unu passau aundi su palloni de is “banderas”, de is campionis brutus de ludu, de is figurinas scambiadas asuta de su bancu, de is stàdius prenus sa domìniga, faiat bisai mannus e pipius de Itàlia. Cussu fùbalu sintziu e viscerali, umanu e chi arribat a su coru, su chi est sparèssiu cun s’inghitzu de su millènniu nou. De cussus annus abarrant is nòminis chi no si podint scaresci de is campionis, erois romànticus modernus, chi ant signau un’època e chi ant fatu sa stòria de su palloni. Comente Igor Protti.
De Rimini, bomber de provìntzia, Igor Protti est unu campioni de aficu e professionalidadi, s’ùnicu giogadori chi est arrenésciu a binciri cuatru bortas sa classìfica de is capu-cannonieris in tres categorias diferentis (in Sèrie A in su 1995-96, in Sèrie B in su 2002-2003 e in Sèrie C in su 2000-2001 e in su 2001-2002) e chi at fatu chistionai de issu po sa capatzidadi de si fai amai e arregordai in totu is pratzas de fùbalu aundi at giogau: Bari, Lazio, Messina, Napoli e Livorno.
Su documentàriu dd’ant a proietai in su Notorious Cinemas de Casteddu cun sa presèntzia de su regista, de is autoris e de su giogadori de fùbalu Leonardo Pavoletti su 15 de abrili a is oto de merì. Su documentàriu at a èssi programmau puru su 13, 14 e 16 de abrili.
Atividade realizada cun su contributu de sa Regione Sardigna – IMPRENTAS 2025-2026. LR 22/2018, art 22. Attività realizzata col contributo della Regione Sardegna – IMPRENTAS 2025-2026. LR 22/2018, art. 22
