«Joint Stars 2025 no est un’esertzitatzione ebbia. S’initziativa previdet fintzas sa solidariedade e sa partetzipatzione de sa populatzione gràtzias a su progetu Joint Stars for Charity». Est su chi leghimus in su situ ufitziale de su ministeru de sa Difesa in ocasione de s’operatzione de annestru bèllicu mentovada e comintzada s’8 de maju.
«Su momentu prus artu de su programma solidale – leghimus in su matessi comunicadu – est in su fine de chida de su 10 e de s’11 de maju cun una mobilitatzione corale de militares, istitutziones, assòtzios e aziendas pro una punna cuncreta: sa còmpora de duas postatziones-letos de terapia intensiva e sub-intensiva pediàtrica pro s’ospidale Arnas “G. Brotzu” de Casteddu».
No est finida: «Sàbadu su 10 e domìniga s’11, dae sas 9 a sas 18 in intro de sa nae “Trieste”, is mèigos de s’Asl de Casteddu e su personale sanitàriu militare ant a fàghere sos controllos gratùitos pro is prus minores».
In fines domìniga, a sas 4.30 de merie, b’at a èssere «s’ispetàculu pro pitzinnos “Pierino e il lupo” in s’ospidale San Michele cun intregu de giogos e materiale didàticu pro is pipios ricoverados».
Sa Regione Sardigna e su Comune de Casteddu ant patrotzinadu totu custu e sa cosa meresset un’arresonu polìticu fundudu.
Cantu nos costant, a nois contribuentes, custas operatziones de annestru bèllicu comente sa Joint Stars? Cantu costant sos mezos militares comente sa nae “Trieste” (prus de unu milliardu de èuros, leghimus)? Custu dinare pro “sa seguresa”, seguros semus chi non podiat èssere impreadu pro afortire sa sanidade pùblica e pro los fàghere in sas istruturas suas sos controllos gratùitos a minores e a mannos? Pro ite non faghimus su contu de cantos pitzinnos bi morint in sos teatros de gherra?
Diat èssere fintzas fàtzile a rispòndere, ma tocat a lu chèrrere.
–
Attività realizzata col contributo della Regione Sardegna – IMPRENTAS 2024-2025. LR 22/2018. Atividade realizada cun su contributu de sa Regione Sardigna – IMPRENTAS 2024-2025 LR 22/2018
