David Murray, Aruán Ortiz, Hamid Drake, Dudù Kouate, e fintzas Antonello Salis, Gavino Murgia, Paolo Angeli, Enzo Favata: protagonistas mannos de ispetàculos, initziativas e laboratòrios. Dae su 27 de austu a su 7 de cabudanni torrat pro sa de 36 editziones, in pratza de su Nuraghe in Sant’Anna Arresi, su fèstival “Ai confini tra Sardegna e Jazz”, a tìtulu “Approdo ad Atlantide – l’uomo che varca i confini”. Unu donu in ammentu de Basilio Sulis, fundadore de su fèstival e tra is primos a àere organizadu fèstival jazz in Sardigna, iscumparsu de santandria de su 2020.
S’Assòtziu Culturale Punto Giara, chi ammaniat su fèstival paris cun su fotògrafu Luciano Rossetti, at aprontadu una mustra fotogràfica a issu dedicada chi pertocat sos momentos significativos, su raportu suo cun sos sonadores e sa mùsica, “su ligàmine intre custa manifestatzione e s’òmine chi pro issa at brincadu sas làcanas tra Sardigna e Jazz”.
Si cumintzat su 31 de trìulas a sos pees de su Nuraghe de Sant’Anna Arresi, cun Daniele Sepe e su progetu Direction Zappa, e si sighit su 7 de austu a sa Villa Salazar de Piscinas cun Enzo Favata e s’iscientziadu Mario Tozzi. Unu fèstival fatu a inghìriu de su territòriu pro l’avalorare, cun cuntzertos fintzas a mangianeddu in sa marina de Porto Pino, o a mesu note in localidade Candiani.
Ma teatru dae su bivu at a èssere fintzas su burgu de Tratalias, Santu Antiogu, s’arenile de Is Solinas a Masainas, Parcu Urbano Canale de su Generale in Carloforte, sa Mina Manna de Serbariu e s’anfiteatru de Monte Sirai in Carbònia, o sa Cantina Sotziale de Santadi.
Dae su 27 de austu arribat imbetzes su fèstival in su burgu medievale de Tratalias, cun O.N.G. Crash, su progetu nou de Gabriele Mitelli. Su primu ispetàculu subra de sa marina, a Is Solinas, at a èssere su 29 austu, cun su percussionista senegalesu Dudù Kouate. Su 31 austu Antonello Salis at a sighire paris cun Gavino Murgia a su sassòfonu, Hamid Drake a sa bateria e Paolo Angeli a sa chiterra.
Su 3 de su mese de cabudanni ispàtziu a s’ensemble de David Murray Bonas New World Trio cun Aruán Ortiz.
