Unu biàgiu de 12.000 chilòmetros, una Fiat Uno 1000 Fire comporada in Igrèsias a 500 èuros, e un’iscuadra sarda pronta a promòvere sos valores de sa solidariedade, de sa paghe e de sa sustenibilidade foras de sas làcanas europeas: est sa marrania de sa truma Islanders de TDM 2000, in partèntzia pro su Mongol Rally 2025.
S’assòtziu casteddàiu, ativu dae su 2000 in su campu de sa mobilidade de is giòvanos e de s’educatzione non formale, tzèlebrat in custa manera 25 de faianas seberende, torra, caminos non cunventzionales. Su Mongol Rally est unu rally internatzionale non cumpetitivu, nàschidu in su 2004, chi at a mòvere su 12 trìulas dae Praga e s’at a concruire in Kazachistàn (e non prus in Mongòlia, pro more de is limitatziones pro is vistos russos). Perunu percursu obrigatòriu, peruna assistèntzia tècnica o logìstica: binchet chie lompet, non chie arribbat primu.
“Amus retzidu in Casteddu maivantos giòvanos de totu s’Europa – at naradu su presidente Luca Frongia – immoe bolimus fòghere connòschere Casteddu e sa Sardigna in su mundu, cun sos valores nostros.”
A presentare s’eventu in su Munitzìpiu de Casteddu bi fiat su presidente de su Cunsìgiu comunale Marco Benucci, chi at cuntzèdidu su patrotzìniu comunale pro un’initziativa “originale e significativa”, sìmbulu de s’impinnu continu de TDM in sa promotzione de sa tzitade.
S’echipàgiu at a èssere formadu dae Luca Frongia, 49 annos, a sa ghia; Federico Gaviano, 44 annos, responsàbile comunicatzione; Gianluigi Mamusa, 29 annos, tècnicu e mecànicu; e Duncan Muscat, 49 annos, navigadore maltesu “ma belle prus sardu”.
Su rally tenet fintzas un’iscopu benèficu: cada iscuadra depet regòllere fundos destinados in parte a s’organizatzione ambientalista Cool Earth e in parte a un’ente seberadu a praghere issoro. Sas veturas ammissas a su rally devent tènnere a su mancu 10 annos e una tzilindrara a suta is 1.300 cc.
Faghet a sighire su biàgiu de sos Islanders in Instagram (@mongolrallytdm25) e in sa pàgina linktr.ee/tdmislanders.
Attività realizzata col contributo della Regione Sardegna – IMPRENTAS 2024-2025. LR 22/2018. Atividade realizada cun su contributu de sa Regione Sardigna – IMPRENTAS 2024-2025 LR 22/2018
