Sa Garante regionale pro s’infàntzia e sa pitzinnia, Carla Puligheddu, sollìtzitat cun apretu sa publicatzione de unu bandu nou pro sa chirca de unu pediatra, cun cuntratu istàbile e non a tempus, pro su distretu “Ales – Terrarba” , cun previsione de intzentivos, indennidades e rimbursos acapiados a sa permanèntzia de su professionista in unu territòriu caraterizadu dae medas dificultades.
Sa rechesta est indiritzada a s’Assessore de sa sanidade de sa Regione Sardigna, a sos Dirigentes de s’Asl de Aristanis e de s’Ares, a sos Responsàbiles de su funtzionamentu de su servìtziu de pediatria cunventzionada, pro more chi valutent cun atentu totu sas atziones.
Sa Garante, cussente de totu sas dificultades de su sistema sanitàriu natzionale in totus sas Regiones, mescamente pro su pertocat sa meighina de base, at fatu presente chi però non tocat a trascurare sos territòrios chi chi tenet prus disacatos, comente sa Marmidda, acanta prus de 600 pipios residentes in sos 20 comunos non tenent su pediatra de riferimentu. Sa proposta fata dae s’Asl, chi at cussigiadu de afidare sos pipios a unu mèigu de famìlia o a sa pediatra chi a su presente est in servìtziu in Mòguru, paret una cosa chi si podet aplicàre a unu nùmeru minore de pipios ebbia.
Custa situatzione est donende medas pensamentos a sa Garante, sende chi su Deretu a su mantenimentu de sos servìtzios essentziales de assistèntzia pediàtrica devet èssere garantidu e in prus sas comunidades locales s’intendent abbonadas. Su pensamentu andat prus che totu a sas famìlias e a sos pipios cun patologias crònicas chi tenent bisòngiu de curas continas e non podent fàghere a mancu de unu pediatra. Est pretzisu a risòlvere in deretura custu problema.
