Si su 14 de austu est su die de sa falada de sos candeleris (la Faradda di li Candareri), in Tàtari b’at chie at disinnadu de fàghere un’artziada su die in antis. Su colletivu artìsticu ArtEntu, pro su 13, at pensadu difatis de aprontare una Azzadda, cun percursu in pigada dae Portha Sant’Antoni fintzas a su Comune de su cabu de logu turritanu. S’apuntamentu est a sas ses de merie de martis. Pro fàghere ite? Pro protestare contra a s’ispecultazione energètica e pro sustentare sa batalla cun creatividade: «cun su chi semus e cun su chi tenimus» movende dae su «rispetu», dae su «diàlogu» e dae sa «responsabilidade individuale e colletiva […] in defensa de custa terra». E pro ite custa Atzadda nche lompet a Palatzu ducale? «Ca dae s’amministratzione atuale de Tàtari cherimus positziones craras e atziones eficatzes cunforma a s’istàntzia presentada dae su Comitadu de sa Nurra».
Sos animdores de sa faina sunt sos de ArtEntu, unu grupu de artistas, agiudados dae operadores culturales e dae sos tzitadinos, chi proponet atziones e ideas pro s’amparu de sos territòrios de s’ìsula e de sos bene de su patrimòniu ambientale, archeològicu e culturale de Sardigna. «ArtEntu – narant issos etotu – si presentat a sa tzitade e a su restu de s’Ìsula cun una manifestatzione parallela a la Faradda di li Candareri. Dae su XVI sèculu la Faradda prenat sas carreras de sa tzitade cun una festa manna di pòpulu ammentende sa liberatzione dae sa pesta. Custa initziativa nostra cheret èssere una manifestatzione làica, contramanu, ma cun su bentu a palas, chi àrtziat de nou sa currente de sos sèculos pro aurare chi su pòpulu sardu potzat disinnare in autonomia su benidore suo».
«Sa Sardigna – si leghet in su volantinu aprontadu pro custa initziativa – non podet èssere reduida a unu terrinu de conchista pro multinatzionales e finantziadores chi mirant a su profetu ebbia. Difendimus sa terra nostra dae s’ispeculatzione energètica. Su tempus chi restat pro contriare s’isfrutamentu energèticu e su devastu ambientale est apretosu. No amus intentzione de abbaidare in manera passiva a custu degòlliu a dannu de s’ambiente e de s’identidade culturale de s’Ìsula nostra». Manifestadu su disìgiu de «fàghere nàschere unu sentidu e un’interessu in cantas prus persones possìbiles in custa cumbata pro s’emantzipatzione, sa libertade de sèberu e de gestione».
Fatu fatu su “ite faghimus”: «Proponimus òperas e atziones artìsticas, individuales e colletivas in sas formas espressivas de sos infinidos modos de sas artes. Cherimus creare ligàmenes e collaboratziones cun sos comitados de sos tzitadinos ativos in sos territòrios e suportare sas atziones tziviles de protesta cun atziones artìsticas a manera de creare sensibilidade e informatzione subra de su problema de s’assaltu de sas multinatzionale energèticas».
Assaltu chi, semper in cussu volantinu, nde faghen bonu resumu: «40.000 ètaros pro campos agrivoltàicos e fotovoltàicos; 27.000 aerogeneradores onshore; 1.200 aerogeneradores offshore; 738 rechestas de impiantos eòlicos». «Ativende totu sos impiantos – narant – si diat prodùere energia pro prus de 55 milliones de persones in una terra de belle unu millione e 600.00 abitantes. Custa disparidade evidèntziat sa natura ispeculativa e isproportzionada de sos progetos energèticos propostos». Progetos chi lis mancant «riflessiones subra de costos e arriscos in tèrmines ambientales, sotziales e econòmicos».
Duncas, pro su 13 est totu prontu. Custa Azzadda, movende dae s’idea cuntzetuale de s’artista Leonardo Boscani, suspit sentidu e connotu dae sa traditzione pru de importu de Tàtari, li Candareri. Una manera pro ingendrare meledos contra a su chi ant disinnadu pro custa terra.
–
Attività realizzata col contributo della Regione Sardegna – IMPRENTAS 2023-2024. LR 22/2018. Atividade realizada cun su contributu de sa Regione Sardigna – IMPRENTAS 2023-2024 LR 22/2018
