Sighi∙nos

Salude, ite ses chirchende?

Atualidade

Un’americana sa primu nòmade digitale de Ollolai

Sa bidda de Ollollai at acollidu sa primu nòmade digitale sua, in s’àmbitu de s’initziativa “Work from Ollolai -Traballa dae Ollolai “. Clarese Partis, una professionista californiana de 39 annos, s’est unida a su progetu in collaboratzione intre su Comunu de Ollolai e s’assòtziu culturale Sa Mata — l’albero delle idee (s’àrbore de sas ideas). Custu progetu punnat a creare una rete de “residèntzias” internatzionales pro professionistas chi disìgiant bìvere e traballare a dae largu in sa terra de Ospitone.

Clarese Partis, una progetista de s’agentzia User Experience, traballat giai dae duos annos comente nòmade digitale e at pigadu parte cun brègiu a s’initziativa, decrarende: “Sa punna mea est de cumpartzire sos connoschimentos ammuntonados in sos annos cun àteros progetistas, de manera chi potzant siat balangiare cun custu traballu, siat seberare su tipu de aziendas acanta traballare. Sos servìtzios digitales, internèt e sas tecnologias noas sunt una parte de importu de ogni àmbitu de sa vida nostra, pro custu est importante chi totus siant a tretu de las impreare. Apo a agiuare chie cheret progetare esperièntzias digitales, domende cura a s’atzessibilidade, a s’inclusividade e a sa sostenibilidade.”

Su Sìndigu Francesco Columbu at dadu su bene bènnidu a Clarese e a sos àteros professionistas chi in sos imbenientes meses s’ant a unire a su progetu. At sutaliniadu chi sa presèntzia issoro at a contribuire a abbivare sa bidda, creende un’ambiente ideale pro bìvere e traballare dae tesu. Custu istile de vida s’at a basare subra elementos comente sa naturalesa, sa trancuillidade, su màndigu sanu, sas traditziones, una comunidade cortesas cun sos istàngios e raportos personales bonos. Custa sinergia at a ingendrare unu passa boghe chi at a dare àteras oportunidades de crèschida e iscàmbiu pro sos abitantes de Ollolai.

Sa presidente de Sa Mata, Veronica Matta, at iscoviadu cun satisfatzione chi sunt istadas retzidas prus de 1000 rechertas dae totu su mundu pro partetzipare a su progetu “Traballa dae Ollolai”. Sas rechertas benint dae paisos comente su Perù, su Mèssicu, su Sudàfrica, s’Ìndia, s’Irlanda, sa Germània, sa Rùssia e sa Polònia. A dolu mannu non totus sos nòmades digitales chi ant manifestadu interessu ant a pòdere èssere retzidos. Matta at postu notu comente prus de 50 paisos in su mundu cuntzedent giai vistos ispetziales e agiudos fiscales pro sos nòmades digitales, ma in Itàlia, su cuadru legislativu est pagu definidu e difìtzile de atuare.

S’initziativa “Work from Ollolai” rapresentat unu passu importante pro sa comunidade de Ollolai e oferit una bisione de sa vida e de su traballu in su benidore, ue sa connetividade globale permitit a professionistas de totu su mundu de traballare dae logos ùnicos comente custa bidda de sa Barbàgia. Cun Clarese Partis comente inghitzadora, su progetu si proponet de creare oportunidade e de promòvere sa bellesa e sa cultura de Ollollai in totu su mundu.

Advertisement. Scroll to continue reading.

De lèghere

Sardigna

«Semus a disponimentu pro un’arresonada in contu de energia nucleare, ma devet èssere neta, ca b’at oriolos pro su chi pertocat sa gestione de...

Sardos

Lughes e umbras de un'editore chi castiaiat prus a longu, intre gèniu e fallimentos.

Sardigna

Arrennegu e indignatzione, bi semus torra rutos. Su protagonismu linguìsticu podet èssere un'antìdotu?

Sardigna

In Loceri, ocasione de sa manifestatzione Primavera nel cuore della Sardegna de custu fine de chida coladu, Francesco, unu pipiu de 8 annos, s’est...