Segundu diversas testadas giornalìsticas, is sordados israelianos de s’Idf, a pustis de su servìtziu in is territòrios de Gaza, diant àere coladu in unas cantas localidades turìsticas italianas, perìodos de “decumpressione” e de pasu. Unu fatu chi in is ùrtimas dies est arribbadu finas in Parlamentu, iscasiddende medas protestas in Sardigna, alimentadas dae sa possìbile presèntzia de is militares israelianos in vacàntzia in Gaddura.
Su Movimentu 5 Isteddos at presentadu un’interrogatzione apretosa a su ministru de s’Internu Matteo Piantedosi, pedende crarimentos; is deputados pentastellados ant naradu chi non si podet bajulare chi s’Istadu acasaget in villàgios de lussu sordados impinnados in una gherra pro sa cale su primu ministru israelianu Netanyahu est incriminadu dae sa Corte penale internatzionale. Is crìticas pertocant fintzas su servìtziu de iscorta chi is fortzas de s’òrdine italianas diant àere garantidu a is militares de s’Idf pro is istesiamentos dae una localidade a s’àtera.
Piantedosi, torrende isceda in Àula, at faeddadu de “grupos culturales giai presentes dae su 2024” e at giustificadu su servìtziu de iscorta cun sa netzessidade de prevènnere episòdios de antisemitismu. Una positzione chi at alimentadu àteras crìticas de s’opositzione. Sa deputada Francesca Ghirra at denuntziadu s’arriscu de acòrdios bilaterales cun Israele, mentras Angelo Bonelli at faeddadu de “birgòngia polìtica e morale”: «Dae una banda aberimus is ospidales a is pipios palestinesos vìtimas de is bombas israelianas, dae s’àtera acollimus in is chi is bombas ddas ant betadas».
Sa presidenta de sa Regione, Alessandra Todde, at pigadu positzione pedende craresa a su Guvernu italianu e a is entes cumpetentes: «Su guvernu no at informadu sa Regione de perunu acòrdiu e no retzidu nisciuna comunicatzione ufitziale», at declaradu, sutaliniende sa netzessidade de trasparèntzia. Todde nd’at aprofitadu pro torrare a cundennare sa polìtica de su guvernu Netanyahu e at ammentadu chi su Cunsìgiu regionale sardu at giai aprovadu una motzione pro su reconnoschimentu de s’Istadu de Palestina e s’agabbu provisòriu de cada cooperatzione cun Israele.
Attività realizzata col contributo della Regione Sardegna – IMPRENTAS 2024-2025. LR 22/2018. Atividade realizada cun su contributu de sa Regione Sardigna – IMPRENTAS 2024-2025 LR 22/2018
