Sa festa de Halloween est apresiende·si e su fumetu de su famadu indagadore Dylan Dog s’ammàniat a apassionare sos leghidores suos cun unu volùmene nou intituladu “L’Oscuro messaggero”, iscritu e pensadu dae su regista sardu Mauro Aragoni.
Mauro Aragoni est unu giòvanu regista tortoliesu, connotu prus che totu pro su curtzumetràgiu “Nuraghes” e pro sa sèrie internatzionale “That Dirty Black Bag”, dae pagu in sa seletzione de Netflix Istados Unidos. Sa collaboratzione sua cun Pasquale Ruju, unu de sos iscenegiadores prus respetados de su giornaleddu italianu, at ingendradu un’istòria chi chistionat de temas iscuros e cumplessos. Ruju, chi iscriet dae annos meda pro is giornaleddos de Dylan Dog e Tex, est un’àteru orgòlliu sardu chi at contribuidu a rèndere custu volùmene galu prus ispetziale.
In s’episòdiu de “L’Oscuro messaggero” maicantas persones retzint pachetes postales e posca si suitzidant. Dae inoghe cumentzat s’inghesta de Dylan Dog, chi gràtzias a s’intùitu suo iscoberit su motivu de totu custas mortes istrambas. S’istòria est istada iscrita cun s’idea de subènnere sas atmosferas de Sclavi, su creadore de su personàgiu, ma cun una versione “splatter”, su gènere chi agradat a Aragoni.
Iscriende su contu Aragoni at dèvidu afrontare su disafiu de iscrìere unu limbàgiu giai icònicu, caraterizadu dae diàlogos intzisivos e dae una narratzione visiva rica meda. Cada vigneta est istada descrita a pilu e a sinnu, frunende a su disegnadore Antonio Marinetti totu sos inditos netzessàrios pro dare vida a sa bisione horror de s’istòria. Marinetti, gràtzias a su talentu suo, at ischidu bortare sas ideas de Aragoni in imàgines ammajadoras e inchietantes, creende un’acòrdiu perfetu intre testu e illustratziones.
Pro tzelebrare Halloween, Sergio Bonelli Editore, in prus de s’editzione regulare de su giornaleddu, disponìbile dae su 14 de santandria, at a fàghere essire fintzas un’editzione limitada pro collezione cun una cobertina lenticulare in 3D. Custa editzione esclusiva at a èssere presentada in anteprima a su Lucca Comics 2024.
Attività realizzata col contributo della Regione Sardegna – IMPRENTAS 2023-2024. LR 22/2018. Atividade realizada cun su contributu de sa Regione Sardigna – IMPRENTAS 2023-2024 LR 22/2018
