Su 2023? Un’annu «orrorosu». Est su chi nos contat Maria Grazia Caligaris de Socialismo Diritti Riforme in contu de cunditziones cartzeràrias. Non pro sos mortos ebbia, ma finamentas pro unos cantos problemas graves chi diant pàrrere sena risolutzione e, mescamente, «cun unu nùmeru de detenudos in intro de sos istitutos de Tàtari, Casteddu e Tèmpiu chi nche bàrigat su nùmeru regulamentare».
Una cosa chi mancat a s’ispissu in s’agenda de custas allegas est sa chi pertocat sas cunditziones de sas persones interessadas dae unos cantos istorbos psìchicos graves: «Non b’at nemmancu un’assistèntzia dèghida», narat Caligaris. Custu cheret nàrrere chi b’at «netzessidade de istruturas alternativas, adeguadas a sos bisòngios de chie imbetzes colat sas dies suas in isolamentu».
E in galera b’at gente de cada fedu: pensemus a sos betzos cun maladias crònicas. Singiale chi sa sanidade de sas istruturas penitentziàrias «cheret organizada a nou, fintzas cun servìtzios esternos de riferimentu efitzientes e a tretu de garantire sa preventzione. Non si l’ismèntighent sos chi nch’amus a sètzere in su guvernu de s’ìsula su mese ch’intrat».
A bisu de s’esponente de Socialismo Diritti Riforme, «s’ìsula pagat unu preju prus chi no artu a su dipartimentu de s’amministratzione penitentziària e a su ministeru de sa Giustìtzia sena retzire in càmbiu s’atentzione dèghida».
Sos nùmeros faeddant a craru. In Uta sos presoneris sunt 601 ma s’istrutura nde cabet 561 (29 sunt fèminas e 112 sos istràngios); in Bancali bi nde diant dèvere istare 454 ma bi nd’ant postu 472 (12 sas fèminas e 132 istràngios); in Nuchis su lìmite de 170 est coladu de 6 unidades (e 6 sunt sos istràngios).
Ùnica nota positiva pro Caligaris est sa de sa crèschida de su nùmeru de sos Diretores, ma in intro de unu cuntestu, cun pagos operadores e problemas sanitàrios, chi «non garantit su recùperu sotziale».
Attività realizzata col contributo della Regione Sardegna – IMPRENTAS 2023-2024. LR 22/2018. Atividade realizada cun su contributu de sa Regione Sardigna – IMPRENTAS 2023-2024 LR 22/2018
