Una novidade manna pro su sardu in su mundu digitale: cun Android 15, su sardu intrat in manera ufitziale intre sas limbas chi si podent cunfigurare in sos aparatos. Unu cambiamentu chi at a permìtere a sos impitadores de cunfigurare su sardu comente limba preferida in sas aplicatziones disponìbiles.
Gràtzias a custa versione noa de su sistema operativu, sos usuàrios como podent organizare sas limbas in òrdine de preferèntzia. Si un’aplicativu est bortadu in sardu, s’at a ativare in manera automàtica in custa limba, sena bisòngiu de àteras cunfiguratziones. Pro ativare s’inditu bastat a sighire su percursu Impostazioni > Sistema > Lingue > Lingue del sistema.
Giai dae meditu s’agatant aplicatziones disponìbiles in sardu, gràtzias a su traballu de su grupu Sardware, chi at giai traduidu software comente su navigadore Mozilla Firefox. Nointames, fintzas a como medas aplicatziones non permitiant de seberare sa limba a manu. Cun Android 15, custu impedimentu non nch’est prus: aplicatziones comente OsmAnd, F-Droid e AuroraStore ant a èssere impostadas in manera automàtica in sardu si s’impitadore l’at seletzionadu comente limba preferida.
Mancari su brègiu tocat a nàrrere però ca b’at galu meda de fàghere. Pro s’ora, difatis, s’interfaghe cumpleta de Android no est disponìbile in sardu e sa tradutzione de su sistema operativu abarrat unu disafiu traballosu, siat pro sa cantidade manna de paràulas de furriare, siat pro sas limitatziones impostas dae Google.
Nointames sas dificultades, su grupu Sardware sighit a traballare pro afortiare sa presèntzia de su sardu in su mundu digitale. A pustis de àere contribuidu a sa localizatzione de Ubuntu Touch, su primu sistema operativu mòbile disponìbile in sardu, s’iscuadra isulana immoe est impinnada a sensibilizare sa comunidade e a fàghere interessare semper prus persones a su progetu, ca totus podet dare su contributu issoro pro mantènnere biu su sardu in sa tecnologia: tradutores, isvilupadores, gràficos, gestores de retes sotziales.
Sas avertèntzia de sos istudiosos sunt craras: a s’agabbu de su sèculu diatn pòdere mòrrere intre su 50 e su 90% de sas limbas de su mundu. Su sardu non devet èssere intre custas. Un’atzione simpre comente su de impostare sa tecnologia de su telefoneddu in sardu, podet bòllere nàrrere meda pro su benidore de sa limba nostra.
Pro chie cheret dare una tèndida de manu, su giassu www.sardware.org oferit informatziones in contu de sos progetos in faimentu e de comente contribuire.
Attività realizzata col contributo della Regione Sardegna – IMPRENTAS 2024-2025. LR 22/2018. Atividade realizada cun su contributu de sa Regione Sardigna – IMPRENTAS 2024-2025 LR 22/2018
