Est ufitziale, pro s’Organizatzione mundiale de sa salude, su Covid-19, dae epidemia nch’est coladu a pandemia. Custu bolet nàrrere ca sa pesta no est prus ungronada in un’àera geogràfia limitada, ma chi nche at brincadu sas làcanas de totu sos istados ispainende•si in totu su mundu. S’Organizatzione elvètica at ammìtidu una cosa chi oramai fiat palisi a totus: su virus s’est difùndidu a petotu, transi in s’Antàrtide.
Corpidos massimamente sos paisos de s’emisferu nord, pro unu totale de 114 istados subra 193. Dae cando s’epidemia s’est iscasidada, in su mese de idas de su 2019, su coronavirus at pitzigadu prus de 118 mìgia persones e nd’at mortu 4.200. Immoe chi est istadu decrada sa pandemia, s’Oms at a pòdere emanare diretivas e imbiare iscuadras de ispetzialistas e materiale sanitàriu in sas natziones prus corfidas comente at fatu in Tzina, Itàlia e Iràn.
Sa decraratzione de pandemia est istada annuntziada dae su diretore generale de s’Oms Tedros Adhanom Ghebreyesus chi at isetadu finas a s’ùrtimu momentu pro lu fàghere, connoschende sos efetos psicològicos chi custu annùntziu diat pòdere tènnere. “Semus apensamentados pro comente su cuntàgiu siat currende in calicuna natzione, pro custu amus selladu chi su Covid-19 podet èssere cunsideradu una pandemia. Custu non bolet nàrrere chi non si podet fàghere nudda pro lu firmare, pro ite si ognunu faghet sas cosas giustas, custa gherra l’amus a pòdere bìnchere”.
A cumbìnchere s’Oms est istada sa curva chi creschet non prus in pagos istados ebbia (sa Tzina finas a carchi die a immoe, s’Itàlia, Iràn e sa Corea de su Sud), ma in totu Europa e in un’Amèrica. Una chida faghet Ghebreyesus aiat avèrtidu chi “b’at paisos chi non sunt faghende bastante pro arrere s’epidèmia”. S’annùntziu de pandemia at a serbire a s’Oms peri pro tènnere una boghe prus forte in sos cunfrontos de custos Paisos “irresponsàbiles”, in mesu a custus sos Istados Unidos chi, tra sos faeddos macos de su Presidente Trump, e sas dificultades tècnicas de fàghere sos esàmines pro averiguare sa positividade, non paret siat preparados a afrontare una possìbile undada de cuntàgios.
“Nos isetamus un’aumentu de su nùmeru de sos casos, de sas mortes e de sos Paisos corfidos” at ispiegadu Ghebreyesus. “Sa definitzione de pandemia non càmbiat sa gravidade de sa situatzione. Non càmbiat su chi s’Oms est faghende e su chi sos Paisos diant dèpere fàghere”. In su matessi tempus, at agiuntu “custa no est solu una crisi sanitària, est una crisi chi at a tocare cada setore, e est pretzisu chi ogna indivìduu siat motivadu pro la bìnchere”.
L.M
