Su Cunsìgiu regionale de sa Sardigna at aprovadu una lege noa mutida Rest – Rèdditu de istùdiu. Si tratat de un’agiudu econòmicu pensadu pro is chi, siat pro dificultades econòmicas, siat ca ant lassadu s’iscola primu de su tempus, bolent torrare a istudiare e otènnere unu tìtulu de istùdiu.
Sa proposta dd’at presentada su grupu polìticu Sinistra Futura e at otentu s’aprovatzione de totu is cunsigeris regionale. S’idea est simpre: istudiare no est unu dovere ebbia, ma fintzas unu modu pro tènnere prus oportunidade in sa vida, agatare traballu e bìvere mègius.
S’agiudu econòmicu est destinadu mescamente a is mannos cun pagas risursas econòmicas. Immoe, chie bolet torrare a istudiare dd’at a pòdere fàghere retzinde unu contributu mensile, chi càmbiat cunforma a su percursu seberadu. Sunt prevìdidos unos 475 èuros cada mese pro is chi si bolent leare sa litzèntzia mèdia, 625 èuros pro is chi bolent otènnere su diploma de iscola superiore e finas a 775 èuros pro frecuentare s’universidade o is cursos de istrutzione tècnica superiore.
Pro retzire custu agiudu est a tènnere unos cantos recuisitos: bìvere in Sardigna, tènnere unu rèdditu bàsciu (cun un’Isee chi non nche isciaddet is 6.500 èuros) e non retzire àteras bussas de istùdiu pro su matessi percursu. In prus s’istudiante at a dèvere frecuentare cun regolaridade is letziones e s’at a dèpere impinnare in s’istùdiu. Si èsseret a abbandonare su cursu sena motivu o a non sighire su programa, su contributu at a agabbare.
Pro finantziare custa lege sa Regione at prevìdidu 3 milliones de èuros a s’annu dae su 2026, chi diat pòdere agiuare belle 400 persones a torrare a cumentzare is istudiare.
Sa punna est parare fronte a problemas chi in Sardigna esistent dae meda, comente s’abbandonu iscolàsticu, sa disocupatzione de is giòvanos e sa netzessidade de medas pitzocos de lassare s’ìsula pro chircare traballu. Cun su Rèdditu de istùdiu, duncas, si bolet donare a prus persones sa possibilidade de imparare, megiorare is cumpetèntzias issoro e fraigare unu benidore mègius sena dèpere emigrare.
Atividade realizada cun su contributu de sa Regione Sardigna – IMPRENTAS 2025-2026. LR 22/2018, art 22. Attività realizzata col contributo della Regione Sardegna – IMPRENTAS 2025-2026. LR 22/2018, art. 22
