S’11 de abrile in Casteddu, is assotziados de s’Assemblea natzionale sarda ant annuntziadu s’editzione 2025 de s’apuntamentu annuale issoro cun Sa Die de Sardigna. Un’apuntamentu chi in prus de èssere una ricurrèntzia est e cheret èssere «una festa de pòpulu peri sas carreras», comente at naradu su presidente de s’assòtziu Riccardo Pisu Maxia. Est semper biu, duncas, s’ammentu de sas acontèssidas de su 28 de abrile de su 1794.
Ma in antis de cussa data (chi ocannu ruet de lunis) àteru b’at. In programma b’est difatis sa rassigna “Isetende sa Die”, un’initziativa chi movet dae bàsciu e chi is organizadores l’ant definida «unu laboratòriu colletivu de identidades» e «una prataforma aberta chi aunit istòria, arte, sotziedade e cunvìviu» pro mèdiu de unu «programma chi atraessat limbàgios e logos diferentes, essidas urbanas e decostrutziones toponomàsticas, performance artìsticas, projetziones tzinematogràficas, laboratòrios, presentatziones editoriales, fiacoladas, atopos e iscutas de sotzialidade movende dae sos màndigos e dae sa limba sarda».
Duncas, «un’invitu pro pònnere meledos a su presente pro more de unu tempus coladu chi pedit galu boghe e giustìtzia». Sos apuntamentos de “Isetende sa Die” sunt in programma dae su 18 a su 23 de abrile. Ma su programma sighit su 26, su 27 e, mescamente, su 28, su die chi ruet sa Die.
«Comente Ans – sutalìniant is organizadores – cherimus chi Sa Die siat una diada de festa pro totu cantos. Torramus a bìvere s’istòria in sos logos protagonistas de sa Sarda Rivolutzione e ammentamus sas acontèssidas de su 28 de abrile de 1794. Milliones de persones afestant a Santu Patrìtziu in intro e in foras de Irlanda. Gasi etotu comente in Olanda cun sa festa de su re o in Catalugna cun sa Diada, Sa Die podet èssere una grandu festa».
Inoghe su programma intreu. Ans est un’organizatzione apartìtica chi traballat pro sa crèschida de sa cussèntzia natzionale.
Attività realizzata col contributo della Regione Sardegna – IMPRENTAS 2024-2025. LR 22/2018. Atividade realizada cun su contributu de sa Regione Sardigna – IMPRENTAS 2024-2025 LR 22/2018
