In unu sistema democràticu s’imprenta diat dèvere èssere s’ogru crìticu de sa sotziedade e de su poderiu. Medas bortas no lu est ca no lu cheret èssere, ma medas bortas custu ruolu est minetzadu dae sas chi lis naramus “querele temerarie” in italianu e “Slapp” in inglesu (Strategic lawsuits against public participation).
Custas atziones legales non naschent cun sa netzessidade reale de tutelare sa reputatzione de una persone chi podet èssere ofesa, ma cun s’intentu deliberadu de pònnere timòria, de fàghere callare sas boghes e de isboidare sas butzacas de giornalistas e ativistas iscòmodos. Sunt duncas una forma de abusu de su diritu chi isfrutat s’isproportzione de mèdios intre chie incurpat — su bonu de sas bortas grupos industriales mannos o esponentes polìticos — e chie informat.
S’obietivu no est su de bìnchere sa càusa, ma de nche giùghere su cronista a unu calvàriu legale infinidu a tales chi sos chi iscrient prefèrgiant s’autotzensura a sa timoria de rifatas millionàrias. S’Itàlia tenet oe unu primadu tristu in custa particulare classìfica. Cunforma a sos datos prus reghentes, su “belpaese” est de sos prus espostos a su fenòmenu.
Sa longària endèmica de sa giustìtzia tzivile e penale agravat sa situatzione, trasformende su protzessu matessi in una pena antitzipada pro su giornalista. Custa “ispada de Dàmocle” impoverit sa dibata pùblica e lìmitat su diritu de sos tzitadinos a èssere informados su giustu.
Su Partidu Radicale, in custas dies, at indiritzadu una lìtera aberta a su Presidente de sa Repùblica, Sergio Mattarella, invochende un’interventu detzisu dae parte de sa càrriga màssima de s’Istadu. In su documentu sos Radicales denùntziant s’inèrtzia de unu Parlamentu chi non produit peruna lege contra a custu “bavàgliu” e proponent una riforma chi acollat de su totu sas diretivas europeas anti-SLAPP.
Sa rechesta a Mattarella est crara: promòvere una normativa chi previdat santziones pecuniàrias severas pro chie comintzat brigas privas de fundamentu, invertende s’arriscu econòmicu dae s’acusadu a s’acusadore.
Atividade realizada cun su contributu de sa Regione Sardigna – IMPRENTAS 2025-2026. LR 22/2018, art 22. Attività realizzata col contributo della Regione Sardegna – IMPRENTAS 2025-2026. LR 22/2018, art. 22
