Si su campu largu est galu ispilende sa moninca referendària cun s’idea de cunvertire sos Nono a sa riforma Nordio in eletores antis-Meloni, e duncas de guvernare s’Itàlia gasi comente est guvernende sa Sardigna (cale si siat cosa chèrgiat nàrrere custu “comente” lu lassamus a àteros analizos), in s’ìsula est s’opositzione chi diat dèvere cagiare su chi b’at in su lapiolu suo in crae antis-Todde. Si unos cantos partidos de s’ex majoria no esserent iscorriolados in intro issoro, naturale.
In sas pàginas de La Nuova Sardegna su PSd’Az ponet in iscena una briga prus chi no atzesa. Su segretàriu Solinas punnat a unu cungressu istraordinàriu intro de s’atòngiu, bisende·si un’abertura programmàtica a su PD, a sos riformadores e àteras fortzas tzìvicas ma cherende lassare a banda su M5s. Su presidente Moro, pro parte sua, at definidu sa cunversione de s’ex “guvernadore” «pagu credìbile» e at cuntestadu sos poderios istatutàrios pro sa cunvoca de s’assise.
Intre unu situ web chi no est agiornadu dae su 2021, telèfonos mudos e sedes ispèrdidas, su partidu de sos Bator Moros paret vivende una situatzione de perìgulu mannu. Solinas revèndicat sas resèssidas eletorales de sos annos colados, ma Moro denùntziat organizatziones territoriales crebadas dae gestiones cummissariales. S’annùntziu de sa “pulitzia” de sas listas de iscritos antìtzipat ischintiddas noas in unu partidu chi, ma no est una novidade custa, bàntzigat intre sos duos polos.
Fintzas in Forza Italia su clima suta de sa chisina abarrat allutu. Unu documentu anònimu denùntziat sa distàntzia manna intre sa crèschida formale de sas adesiones e sos cunsensos in mancu, critichende una “campagna achistos” chi est ponende anneos in sa base istòrica. S’iscontru frontale tenet comente protagonistas s’ex coordinadore Cappellacci e su grupu de sos cussigeris regionales ghiadu dae Gianni Chessa (ex Psd’Az). Custu, forte de 996 tèsseras regortas in 51 comunes de su sud, reclamat ispàtziu e minetzat unu passu a dae segus si no at a èssere garantida sa pluralidade. Sa Pasca est a palas, sa passione est comintzende.
Atividade realizada cun su contributu de sa Regione Sardigna – IMPRENTAS 2025-2026. LR 22/2018, art 22. Attività realizzata col contributo della Regione Sardegna – IMPRENTAS 2025-2026. LR 22/2018, art. 22
