Bìsita noa de sa garante de sos presoneris Irene Testa in sos logos de reclusione de Sardigna. Logos in ue bortas meda no est petzi s’ogru nostru a non bi lòmpere ma fintzas sos diritos e sas punnas costitutzionales. Sas dies coladas nch’est lòmpida a sa Domo tzircundariale de Uta.
«Custa bìsita – narat – at cunfirmadu galu de prus sa situatzione de precariedade estrema e de violatzione de sos diritos umanos mescamente in contu de assistèntzia sanitària». «Sunt belle 655 – at annantu – sos detenudos custrintos a istare in logos prus chi non prenos e privados de s’assistèntzia sanitària prevìdida dae sas normas. Apo agatadu unos cantos detenudos disàbiles in cunditziones inumanas chi non si podent atzetare».
Fatu s’esèmpiu de una setzione in ue sunt chimbe sas persones interessadas dae invalididades graves: bator in carrotzina e unu cun sas istampellas. «S’ùnica tzella dèghida pro sas disabilidades no est bastante pro cuntentare sas esigèntzias de totu cantos, custringhende sos àteros detenudos a istare in cunditziones de illegalidade e a s’afidare a sos cumpàngios de tzella pro sas atividades basilares de cada die».
Àteru problema registradu est su de sas barreras architetònicas chi «impedint s’intrada a sos servìtzios igiènicos in manera segura». «Custa situatzione umiliante e degradante – narat Testa – ponet in perìgulu sas salude fìsica e mentale de sos presoneris». A totu custu b’at de agiùnghere su perìgulu de azeramentu de su 118 chi ponet oriolos mannos no a sos detenudos ebbia ma fintzas a sos familiares issoro.
«Pedo deretu – at serradu Testa – un’interventu cun urgèntzia dae parte de sas autoridades cumpetentes pro garantire su deretu prenu a sa salude de totu cantos. Pedo chi si pòngiant a norma sas tzellas pro sos disàbiles e chi a s’istitutu no li manchet su personale sanitàriu dèghidu pro gestire unu tratamentu dignitosu».
Attività realizzata col contributo della Regione Sardegna – IMPRENTAS 2023-2024. LR 22/2018. Atividade realizada cun su contributu de sa Regione Sardigna – IMPRENTAS 2023-2024 LR 22/2018
