“Ammenta, mùsica e curtura in Bidda”. Est custu su tìtulu de s’eventu organizadu dae s’assòtziu S’Orcu ‘e Montiarvu in programma pro sàbadu su 17 de maju in Thiniscole. Una rassigna chi, narant is promotores, «naschet cun sa voluntade de contare s’istòria de unu territòriu» pro mèdiu de «paràulas e mùsica» iscritas in «pàginas de importu de sa cultura thiniscolesa e sarda».
Thiniscole est difatis sa bidda nadia de grupos istòricos de s’iscena rock isulana (dae sos Kenze Neke e sos Askra finas a sos prus de como Qvaalude e a su progetu nou Nesika). Ma est fintas su logu in ue b’ant fatu fèstival de importu, in ue bivet su connotu de su càntigu a tenore, in ue non sunt mancados e mancu como mancant is iscritores, in ue resistet su carrasegare antigu cun essidas ierriles ebbia.
S’eventu est pro sa diada intrea in intro de sa corte Sinis-Mele de carrera de Nurra, un’ispàtziu ispantosu a pagu tretu dae sa crèsia de Sant’Antoni ‘e su ‘ocu.
Su comintzu est pro sas 11 cun s’abertura de unos cantos stand. Presentes sos meres de domo de s’Orcu (cun bìsitas ghiadas in s’àrea museale temporànea e cun sa projetzione de su metràgiu curtzu omònimu dirìgidu dae Antoni Conzu), s’Acadèmia de sa mùsica sarda (cun una mustra e duos laboratòrios pro s’aprontu de istrumentos musicales sardos istòricos), sa libreria Cose di Carta (cun testos de literadura thiniscolesa e sarda); Emergency e s’Associazione italiana Tromboastenia di Glanzmann. In prus b’est fintzas una mustra chi pertocat s’istòria musicale de Thiniscole, cun fotografias inèditas, vìdeos, artìculos, locandinas istòricas e ogetos.
A sas 11.30 comintzat s’arresonada cun sos saludos de Luca Derosas (presidente de s’Orcu) e sos interventos de Claudio Roccia (bassista de sos Kenze Neke), Marco Cau (boghe e chiterra de sos Askra), Domenico Carta (contra de su tenore Luisu Ozanu), Tonino Asproni (cantore de su coro polifònicu Montalbo), Fabio Coronas (chi faeddat de iscritura de testos de protesta e de s’istòria de sos fèstival in Thiniscole). S’arresonada, antitzipada e serrada dae sas cantadas de su Coro Montalbo, l’at a introduire e a moderare su giornalista e tradutore Mauro Piredda.
A sa una b’est imbetzes su pràngiu pro is bisitadores, semper a s’incuru de S’Orcu ‘e Montiarvu. Dae sas bator finas a mesunote b’est in fines su cuntzertu cun su tenore Usùsule (su primu grupu in su palcu), Manuella (a sas 16.45), Qvaalude (a sas 17.45), Nugoro Rude (a sas 19.15) e Nesika (a sas 21.30). Custu progetu nou movet dae s’esperièntzia de sa band locale I Saluti e si presentat cun su discu de esòrdiu cun testos in sardu e in italianu.
Subra de su palcu finamentas unos cantos òspites ispetziales comente sos giai mentovados tenore Ozanu e coro Montalbo, Marco Cau e Claudio Roccia, sos cumponentes de Kenze Neke e Askra Sandro Usai e Luciano Sezzi, sos ex I Saluti Luca Solinas, Luciano Pau e Alessio Spanu, Manuela Manca e Siria Cau. Sa serrada est afidada a Radio Zoo Dj Set.
«Nos auguramus – afirmant sos assotziados de s’Orcu – de colare, in pare a chie b’at a èssere, una die de cultura, de ammentos e de mùsica galana. Est pro cussu chi su fèstival si narat Ammenta, pro no ismentigare su patrimòniu istòricu e culturale de sa comunidade».
Attività realizzata col contributo della Regione Sardegna – IMPRENTAS 2024-2025. LR 22/2018. Atividade realizada cun su contributu de sa Regione Sardigna – IMPRENTAS 2024-2025 LR 22/2018
