Domìniga su 16 de làmpadas, in ocasione de sas Dies Europeas de s’Archeologia, sa sotziedade Archeonova, chi gestit sos giassos de S’Arcu de is Forros e Sa Carcaredda, organizat una die de escursiones intre sos sartos de Biddamanna Strisàili e Talana. Pro s’ocasione ant a èssere inaugurados de sos itineràrios noss “Radici”.
A sa làcana intre Biddamanna e Talana, ghiados dae Barbara e Luca, ghias ambientales escursionìsticas de s’Assòtziu Italianu Ghias Ambientales Escursionìsticas, sos bisitadores s’ant a pòdere imbèrghere in unu paisàgiu intre terra, abba e chelu, a sa chirca de sas raighinas de s’istòria umana e de s’istòria naturale. Protagonistas printzipales ant a èssere sos medas àrbores monumentales, essèntzias e matas raras chi de custu territòriu e sos sitos archeològicos chi medas millènnios a oe, dae su neolìticu, sos Sardos nos ant lassadu in eredade.
Su logu de addòbiu at a èssere a sas 8.30 acanta s’istatzione de servìtziu s’Altura. Dae cue sos partetzipantes s’ant a arribbare a sa localidade Su Fundale ‘e Canna, pro cumintzare su percursu de unos 7 km, chi at a lòmpere a su cumplessu archeològicu de Sa Carcaredda. No ant a pòdere partetzipare prus de 15 pensones.
S’at a mòvere dae una cuota de 980 m, cun unu dislivellu positivu de 120 m. Lòmpidos a un’artària màssima de 1.080 metros s’at a torrare a calare de unos 150 metros, finas a su logu de arribu. Su giru durant belle 6:30, mentras sa dificultade de su percursu est pro su prus de Livellu E, cun unu tretu piticu meda tècnicu de livellu EE, chi però si podet peri brincare. S’asseguratzione est incluida in su costu, su pràngiu a sicu nono. Pro prenotare e pro ischire calicuna cosa in prus de s’echipagiamentu e de sos costos, est a mutire su nùmeru 378.3027077 o iscrìere a s’indiritzu info@archeonova.it
In sas Dies Europeas de s’Archeologia, su 15 e su 16 de làmpadas, s’ant a pòdere bisitare finas sos sitos archeològicos de S’Arcu ‘e is Forros e Sa Carcaredda. Su giassu de S’Arcu ‘e is Forros acasàgiat duos tèmpios mannos a megaron, unu bidditzolu e ofitzinas dedicadas a sa traballadura de sos metallos, mentra in Sa Carcaredda s’ant a pòdere ammirare sos rastos de sa religiosidade de sos nuraghesos. Durante sa bìsita at a èssere possìbile connòschere sa traballadura de sa tzeràmica e sa tessidura in s’antighidade.
S’oràriu de bisita est dae sas 9.00 a sas 12.30 e dae sas 16.00 a sas 20.00, cun intrada reduida a 3 èuros.
Attività realizzata col contributo della Regione Sardegna – IMPRENTAS 2023-2024. LR 22/2018. Atividade realizada cun su contributu de sa Regione Sardigna – IMPRENTAS 2023-2024 LR 22/2018
