«Sennora presidente istimada, est un’onore mannu pro me a bos nch’imbiare custa lìtera chi mustrat sa fortza e s’impignu de sas relatziones cummertziales bostras e su fatu chi sos Istados unidos ant disinnadu de sighire a traballare cun s’Unione europea, mancari unu de sos peus deficit cummertziales nostros cun bois».
In s’istoriografia de sa cuntemporaneidade b’amus a agatare fintzas custa epìstula, chi pròpiu gasi comintzat, cun su presidente Usa Donald Trump indiritzende·si cun tràgiu patzìficu a sa ghia de sa Cummissione europea Ursula von der Leyen. Duncas cun un’istèrrida chi non rinùntziat a sa captatio benevolentiae e cun una serrada chi marcat a craru «sas mègius uras».
Su coro de sa chistione est antitzipadu dae un’invitu, cun Trump matessi chi ponet in parte a s’interlocutora. «Bos invitamus a pigare parte a s’economia istraordinària de sos Istados unidos de Amèrica, su primu mercadu de su mundu».
Naradu custu, sighint su carignu paternalista e un’ammonestu pro is fìgios malos: «Dae su primu de austu faghimus pagare a s’Unione europea una tarifa de su 30% ebbia pro sos produtos Eu chi intrant a Amèrica, partzida dae totu sas tarifas setoriales. Sa mercantzia tramudada pro inghiriare una tarifa prus arta las amus a assugetare a cussa tarifa prus arta».
E fintzas unu tzafu: «Si pro cale si siat motivu disinnades de aumentare sas tarifas bostras, cale si siat pertzentuale ais a seberare l’amus a annànghere a su 30% chi aplicamus nois».
E nois? E in Sardigna? Cunforma a su chi narat sa Cgia de Mestre, custos dàtzios ant a penalizare mescamente s’esportatzione de sas regiones meridionales de s’istadu italianu ca tenent una diversificatzione produtiva bassa.
«Si a pustis de s’atzàrgiu, de s’allumìniu e de sos derivados suos, sas veturas e sa cumponentìstica auto sos Istados unidos – e fatu-fatu àteros paisos de su mundu – disinnarent de artziare sas barreras cummertziales fintzas a àteros benes, sos efetos negativos pro su sistema produtivu nostru diant pòdere còrfere de prus sos logos in ue sa dimensione econòmica de s’export est cunditzionada a mannu dae pagos setores mertzeològicos».
Sa regione cun su peus ìnditze de trasformatzione est, mancu a lu nàrrere, sa Sardigna (95,6%) in ue «dòminat s’export de produtos chi derivant dae sa rafinatzione de su petròliu».
Attività realizzata col contributo della Regione Sardegna – IMPRENTAS 2024-2025. LR 22/2018. Atividade realizada cun su contributu de sa Regione Sardigna – IMPRENTAS 2024-2025 LR 22/2018
