Acullièntzia, tradutziones, libretos sanitàrios, unu glossàriu mèdicu e cursos pro su personale: su progetu punnat a fàghere de su sardu una limba de servìtziu fintzas in àmbitu sanitàriu.
Su sardu intrat in manera ufitziale in is servìtzios sanitàrios de s’Ogiastra. Si mutit “Su sardu in corsia” su progetu de s’ASL Ogliastra pro promòvere s’impreu de sa limba sarda in intro de s’Ospidale Nostra Sennora de sa Mercede de Lanusè, trasformende·dda in unu trastu de acasàgiu, informatzione e incroimentu pro malàidos e tzitadinos.
Finantziadu cun su bandu de sa Regione Autònoma de sa Sardigna TuLiS – Tutela Limbas Sardas, annualidades 2025-2026-2027, dedicadu a s’amparu, promotzione e valorizatzione de sa limba sarda e de is variedades suas (Lege 482/1999 e L.R. 22/2018), sa sede sua est acanta sa sala de isetu de sa Domo de sa Salude, cara a s’ospidale, e at a èssere abertu dae su lunis a su sàbadu, transi chenàbura, dae is 8.00 a is 17.00.
S’initziativa, bòlida meda dae su Diretore Generale dot. Andrea Fabbo, at a èssere coordinada dae sa Diretora de sa SC Tècnicu-Logìsticu, Patrimòniu e Achistos, ing. Gabriella Ferrai, cun su sustennu de is responsàbiles de su protzedimentu dot.a Michela Casari e sig.ra Giuseppina Foddis.
Su progetu previdet s’ativatzione de un’ufìtziu linguìsticu cun bator operadores dedicados, ativu chimbe dies a sa chida. Su còmpitu issoro est de frunire informatziones e orientamentu a is impitadores, ispainare comunicados de imprenta, avisos e cuntentos de su giassu istitutzionale de s’ASL, contribuende a apresiare de prus is servìtzios sanitàrios a sa populatzione e a avalorare su patrimòniu linguìsticu de su territòriu.
Intre is fainas prevìdidas ddoe tenet sa realizatzione de opùscolos informativos dedicados a is servìtzios sanitàrios printzipales e a is temas de sa preventzione, cun publicatziones in contu de cardiologia, pediatria, ortopedia, chirurgia, diabeta, meighina de su traballu, nutritzione, preventzione oncològica, luta a su tabagismu e reduida de is infetziones acapiadas a s’assistèntzia. De prus, ant a èssere realizados in limba sarda materiales pro is famìlias, comente su “Libreto de sa salude”, dedicadu a sa crèschida de su pipiu, a is vatzinatziones e a is controllos.
Atentzione meda at a èssere donada a sa comunicatzione intre operadores sanitàrios e malàidos. Su progetu previdet difatis sa realizatzione de su frasàriu “Su sardu in s’ispedale”, una ghia pràtica destinada a fatzilitare su diàlogu in is repartos, in prus sa produtzione de unu glossàriu mèdicu in limba sarda cun sa terminologia ispetzialìstica de is àmbitos sanitàrios printzipales. Sunt prevìdidos fintzas vìdeos informativos, materiales pro is ischermos de s’ispidale e una ghia pràtica pro malàidos e familiares cun inditos in contu de is deretos, is servìtzios e is percursos de sanamentu.
No at a mancare unu tretu dedicadu a sa divulgatzione. Cada mese est prevìdida sa publicatzione de su periòdicu “Noas dae s’ispidale”, chi at a cuntènnere agiornamentos de is servìtzios de s’ASL, intervistas a mèdicos e operadores, aprofundimentos, informatziones utilosas pro is tzitadinos e artìculos dedicados a s’istòria de s’ispidale. Su giornale at a èssere donadu a s’indonu in is repartos e at a èssere disponìbile fintzas in formadu digitale pro mèdiu de su giassu istitutzionale e is canales sotziales de s’Azienda sanitària.
Intre is progetos editoriales ddoe est fintzas sa realizatzione de su volùmene fotogràficu “S’Ispidale de s’Ogiastra”, chi at a torrare a costrùere s’istòria de s’ospidale a traessu de imàgines de època, fotografias cuntemporàneas e testimonias de mèdicos, infermieris, tècnicos e de totus is chi, in is annos, ant contribuidu a s’isvilupu de sa sanidade ogiastrina. Su volùmene at a èssere presentadu publicamente a s’agabbu de su traballu de chirca e documentatzione.
Su progetu càstiat fintzas a sa formatzione. Cun su percursu “Nara trintatrès” ant a èssere organizados cursos de limba sarda de livellu base, intermèdiu e avantzadu, intregados mescamente a su personale de s’ASL – mèigos, infermieris, tècnicos e amministrativos – ma abertos fintzas a sa tzitadinàntzia. Sa punna primàrgia est de frunire cumpetèntzias linguìsticas ùtiles siat in sa comunicatzione fitiana siat in sa redatzione de documentos sanitàrios e amministrativos, favorende un’impreu semper prus difùndidu de sa limba sarda in is ambientes istitutzionales.
At a èssere in prus ativadu unu blog dedicadu, chi at a permìtere a totus de sighire is fainas de s’isportellu linguìsticu. Ant a èssere in prus abertos unu blog, una pàgina Facebook e unu profilu Instagram, collegados a is canales ufitziales de s’ASL Ogiastra. Is operadores ant a traballare a manu tenta cun s’addetu de s’imprenta de sa Asl dot. Lorenzo Mattana.
Pro informatziones at a èssere in prus disponìbile sa casella de posta eletrònica istitutzionale limbasarda@aslogliastra.it.
Atividade realizada cun su contributu de sa Regione Sardigna – IMPRENTAS 2025-2026. LR 22/2018, art 22. Attività realizzata col contributo della Regione Sardegna – IMPRENTAS 2025-2026. LR 22/2018, art. 22
