Si torrat a faeddare de s’Einstein Telescope in sos chirros luvulesos de Sos Enatos gràtzias a su progetu Miti (Multimessenger infrastructures and technologies in Italy). Finantziadu dae su ministeru de s’Universidade e de sa Chirca (su Mur) cun 15 milliones de èuros in intro de su Programma natzionale chirca, innovatzione e cumpetitividade 2021-2027, su progetu at a isvilupare tecnologias de avanguàrdia pro s’osservatòriu de sas undas gravitatzionales chi diant chèrrere fàghere in Sardigna.
S’initziativa non pertocat sa terra nostra ebbia, a dae chi su finantziamentu est destinadu a ses setziones de s’Infn (s’Istitutu natzionale de fìsica nucleare): in prus de Casteddu bi sunt Perùgia (chi est s’ente cabu de filera), Roma, Nàpoli, Gènova e sos Laboratòrios natzionales de su sud. In Sardigna – ue sunt faeddende de una leva econòmica istraordinària – su pianu previdet su potentziamentu de su laboratòriu Etico2 in Casteddu, ispetzializadu in su filtràgiu de su rumore sìsmicu, e s’aviu imbeniente de su cantieri de su SunLab in Lùvula, chi at a ospitare unu tzentru de trasferimentu tecnològicu pro connètere sa chirca iscientìfica de primore a sas impresas de su territòriu.
«Cun s’aviu de Miti – at naradu sa presidente de sa Giunta regionale Alessandra Todde – sa candidadura pro ospitare s’Einstein Telescope e su comintzu imbeniente de su cantieri de su laboratòriu SunLab si cunfirmant un’ocasione de non pèrdere pro sas impresas de Sardigna chi chèrgiant investire in s’innovatzione tecnològica. Sos laboratòrios noos ant a èssere unu tzentru propulsivu pro sas tecnologias e sa crèschida de sas cumpetèntzias tècnicas de sas aziendas nostras». Sa punna decrarada est sa de mudare su nugoresu in unu polu tecnològicu de livellu mundiale, capatze de atràere investimentos noos e generare oportunidades istàbiles de ocupatzione cualificada.
Atividade realizada cun su contributu de sa Regione Sardigna – IMPRENTAS 2025-2026. LR 22/2018, art 22. Attività realizzata col contributo della Regione Sardegna – IMPRENTAS 2025-2026. LR 22/2018, art. 22
