Carbònia, acabu de is annus Otanta. A pustis chi serrant in minas, sa citadi bivit is efetus de sa crisi post-industriali: disocupatzioni, degradu, sensu de abandonu.
In unu contestu aici fatu, Caterina e Cinzia, de sèixi annus, amigas aunidas de sa passioni po su pallavolo, circant unu benidori diferenti de cussu chi sa terra insoru parit chi tèngiat po issas.
Caterina cuat una fragilidadi a palas de unu caràtiri forti: sa crisi de is minas at marcau sa famìlia sua e issa isperat de si nd’andai de una realtadi chi dda alupat. Cinzia cumpartzit su matessi disìgiu de si fuiri. Is duas piciocas tando dda acabant a intru de istòrias aundi si fait ònnia borta prus difìtzili a ndi essiri, finas a una fini dramàtica.
Est sa trama de “Stelle nel pozzo” sa pellìcula noa de su regista Paolo Carboni chi su ses de trìulas dd’at presentada po sa prima borta pròpiu in Carbonia: duos spetàculos cun pagu prus o mancu 700 personas.
Ispirau liberamenti a un’istòria sarda abarrada po meda tempus (immoi puru) chentze solutzioni, sa de Gisella Orrù, su film contat s’amistadi e sa circa de sa dignidadi in d’unu contestu de marginalidadi, donendi una bisioni diferenti a pitzu de sa Sardigna post-industriali e de is contraditzionis suas, intra de feridas socialis e capacidadi de resistèntzia.
«Stelle nel Pozzo nascit de su disìgiu de contai una stòria giai contada bortas medas, ma de ddu fai de una prospetiva diferenti: cussa de sa cunditzioni de vida de is giòvanas protagonistas», narat su regista Paolo Carboni. «Prus de sa crònaca bolia contai su chi sa crònaca lassat a una parti: s’adolescèntzia in d’una Sardigna post-industriali a s’acabu de is annus Otanta, fata de amistadi forti, gana de si fuiri e fragilidadi».
Sa regia tenit luxi naturali, logus realis, una màchina da presa discreta chi castiat chentze de giudicai. Su montàgiu, essentziali e cun tempus longus, lassat tretu a is protagonistas e a sa fortza espressiva insoru. Su formau anamòrficu donat a su contu unu respiru cinematogràficu, lassendi is tonus de sa crònaca niedda po torrai dignidadi a is protagonistas comenti personàgius, e no comenti casus de crònaca.
Su film, unu curtzumetràgiu, dd’at scritu e diretu Paolo Carboni, dd’at produidu Areavisuale Film cun Terra de Punt (Salvatore Cubeddu) e Art&Show Srl (Maria Elena Garau).
Atividade realizada cun su contributu de sa Regione Sardigna – IMPRENTAS 2025-2026. LR 22/2018, art 22. Attività realizzata col contributo della Regione Sardegna – IMPRENTAS 2025-2026. LR 22/2018, art. 22
